Бел | Рус | Eng PDA
навіна

ад 23.11.2010

Праграма развіцця малочнай галіны на 2010-2015 гады зацверджана ў Беларусі

У Беларусі ў 2011-2015 гадах плануецца рэалізаваць амаль тысячу буйных інавацыйных праектаў – С.Сідорскі

1 2 3 4 5
У Беларусі ў 2011-2015 гадах плануецца рэалізаваць 965 буйных інавацыйных праектаў. Аб гэтым 23 лістапада паведаміў Прэм'ер-міністр Рэспублікі Беларусь Сяргей Сідорскі, выступаючы ў Гомелі на абласным сходзе дэлегатаў IV Усебеларускага народнага сходу.

На праекты па гэтай дзяржпраграме будзе накіравана Br100 трлн. Сяргей Сідорскі адзначыў, што на аналагічную праграму, якая завяршаецца, было выдзелена Br23 трлн., што ў чатыры разы менш у параўнанні з планамі на наступныя 5 гадоў.

У наступнае пяцігоддзе ў рэспубліцы па дзяржпраграме інавацыйнага развіцця будзе створана 207 новых прадпрыемстваў, мадэрнізавана 380, на 400 прадпрыемствах будуць укаранёны інавацыйныя тэхналогіі. У прыватнасці, у Гомельскай вобласці плануецца пабудаваць завод па вытворчасці ліставога, сартавога металапракату, увесці ў строй новыя магутнасці ў ААТ "Гомельшкло", на Мазырскім НПЗ, Гомельскім хімічным заводзе і шэрагу іншых прадпрыемстваў.


Прэм’ер-міністр падкрэсліў, што ў Беларусі нацыянальная мадэль сацыяльна арыентаванай эканомікі ў 2011-2015 гадах будзе захавана.

Паводле слоў Прэм'ер-міністра, гэта рашэнне кіраўніцтва краіны грунтуецца на пераемнасці мэт і прыярытэтаў, якія былі сфармуляваны і рэалізоўваліся ў папярэднія гады. "Нацыянальная мадэль сацыяльна арыентаванай эканомікі, якую ў свой час сфармуляваў кіраўнік дзяржавы, добра зарэкамендавала сябе на працягу апошніх 15 гадоў, і мы будзем прыкладаць усе намаганні, каб у далейшым яна стала ўзорам і для іншых дзяржаў", – адзначыў Сяргей Сідорскі.

Асаблівасцю развіцця эканомікі Беларусі ў 2006-2010 гадах стала яе праграмнае абнаўленне, калі мадэрнізаваліся не асобныя прадпрыемствы, а цэлыя галіны, падкрэсліў Прэм'ер-міністр. У прыватнасці, было праведзена карэннае тэхпераўзбраенне машынабудавання, малочнаперапрацоўчай, кансервавай галін і іншых.

Маштабнай стала дзяржпраграма адраджэння і развіцця вёскі. За апошнія пяць гадоў айчыннымі вытворцамі было пастаўлена ў АПК больш як 9 тыс. новых збожжаўборачных і 3 тыс. кормаўборачных камбайнаў, 15 тыс. трактароў і іншых відаў тэхнікі. За гэты час рэканструявана 1,2 тыс. малочнатаварных ферм, 211 жывёлагадоўчых комплексаў і 60 птушкафабрык, узведзены новыя аб'екты. Гэта дало магчымасць забяспечыць у поўным аб'ёме харчовую бяспеку краіны, а таксама нарошчваць экспарт. "У 2010 годзе аб'ём экспарту прадуктаў харчавання Беларусі павінен скласці каля Br3 млрд., што ў 6 разоў перавышае паказчык 2000 года", – дадаў Сяргей Сідорскі.

Паводле слоў Прэм'ер-міністра, за гэты перыяд створана 187 прамысловых прадпрыемстваў, мадэрнізавана больш як 320, укаранёна больш як 500 новых тэхналогій.

Аналізуючы вынікі развіцця эканомікі Гомельскай вобласці, кіраўнік Урада адзначыў рэалізацыю такіх маштабных праектаў, як увод у эксплуатацыю трубнай вытворчасці на Беларускім металургічным заводзе, асваенне выпуску бензіну па стандарту Еўра-5 у ААТ "Мазырскі нафтаперапрацоўчы завод", рэканструкцыя Добрушскага фарфоравага завода.

Сяргей Сідорскі таксама адзначыў, што Беларусь выйшла на першае месца ў будаўніцтве жылля на аднаго жыхара сярод краін СНД, змагла апярэдзіць і шэраг іншых краін свету. Да канца гэтага года ў рэспубліцы будзе пабудавана амаль 7 млн. кв.м жылля, у той час як у 1991 годзе гэта лічба складала ўсяго 1,9 млн. кв.м.

У будучым пяцігоддзі галоўная задача, над якой будзе працаваць урад, – забеспячэнне росту дабрабыту і паляпшэнне ўмоў жыцця насельніцтва на аснове інавацыйнага развіцця і павышэння канкурэнтаздольнасці нацыянальнай эканомікі. Магістральным шляхам для развіцця эканомікі будзе стварэнне ў Беларусі прынцыпова новых вытворчасцей, прадпрыемстваў і галін, якія вырабляюць экспартаарыентаваную высокатэхналагічную прадукцыю.

Рэалізацыя Праграмы сацыяльна-эканамічнага развіцця Рэспублікі Беларусь на 2011-2015 гады дасць магчымасць павялічыць рэальныя грашовыя даходы насельніцтва ў 2015 годзе да ўзроўню 2010 года ў 1,7-1,76 раза на аснове забеспячэння росту ВУП у 1,62-1,68 раза. Аб'ём прамысловай вытворчасці павінен вырасці ў паўтара раза, сельскай гаспадаркі – у 1,45 раза.

Паводле слоў Прэм’ер-міністра, аб'ём экспарту сельскагаспадарчай прадукцыі Беларусі ў 2010 годзе, паводле папярэдніх даных, можа дасягнуць $3 млрд.

У 2009 годзе экспарт гэтай прадукцыі склаў $2,3 млрд., у 2000-м – толькі $500 млн. Такім чынам, за 10 гадоў экспарт узрос прыкладна ў 6 разоў. Такі значны прырост паставак прадуктаў харчавання за мяжу быў дасягнуты за кошт асваення новых тэхналогій і карэннай мадэрнізацыі АПК краіны.

У праекце Праграмы асноўных напрамкаў сацыяльна-эканамічнага развіцця Беларусі на 2011-2015 гады прадугледжваецца, што вытворчасць сельскагаспадарчай прадукцыі павінна вырасці ў 1,45 раза.

Сяргей Сідорскі паведаміў, што цяпер ва Ўрадзе завяршаецца работа над стварэннем галіновых праграм, у якіх будзе выкладзена стратэгія развіцця аграрнага комплексу.

Прэм’ер-міністр таксама адзначыў, што Беларусь выйдзе на дадатнае сальда знешняга гандлю да канца 2013 года.

Дасягнута гэта будзе, паводле слоў Сяргея Сідорскага, за кошт павелічэння аб'ёму экспартных паставак. Што датычыцца Гомельскай вобласці, то згодна з планам сацыяльна-эканамічнага развіцця рэгіёну ўжо ў 2011 годзе тут павінны забяспечыць дадатнае сальда знешняга гандлю ў аб'ёме $230 млн., а ў 2015 годзе – $400 млн.

Падчас выступлення Прэм'ер-міністр даручыў кіраўніцтву рэгіёну пачаць пошук пляцоўкі для размяшчэння індустрыяльнага парку для развіцця высокатэхналагічных кітайскіх вытворчасцей у Гомельскай вобласці.

Калі рэгіён прапануе самую вялікую пляцоўку, то гэтыя вытворчасці будуць размешчаны тут, сказаў Сяргей Сідорскі. Індустрыяльны парк з удзелам кітайскага капіталу зможа ў значнай ступені ўзмацніць эканоміку вобласці і ўмацаваць экспартны патэнцыял.

"Неабходна больш актыўна весці работу з нашым стратэгічным інвестарам Кітаем па ўсіх напрамках", – падкрэсліў Сяргей Сідорскі, нагадаўшы, што аб'ём прадастаўленых гэтай краінай крэдытных рэсурсаў складае $15 млрд.


Прэм’ер-міністр таксама паведаміў, што глыбіня перапрацоўкі нафты на ААТ "Мазырскі НПЗ" да 2014 года дасягне 92 працэнтаў.

Паводле слоў Сяргея Сідорскага, павелічэнне глыбіні перапрацоўкі нафты будзе ажыццёўлена за кошт рэалізацыі шэрага інвестыцыйных праектаў, у тым ліку і будаўніцтва ўстаноўкі ізаметрыі. Да 2014 года НПЗ павінен увайсці ў лік лепшых сусветных прадпрыемстваў, якія займаюцца нафтаперапрацоўкай.

Мазырскі нафтаперапрацоўчы завод уведзены ў эксплуатацыю ў 1975 годзе, пераўтвораны ў ААТ у 1994 годзе. У статутным фондзе прадпрыемства доля дзяржавы складае 42,7 працэнта, АТ "НГК "Славнафта" – 42,6 працэнта, іншых акцыянераў – 14,7 працэнта. Завод уваходзіць у склад канцэрна "Белнафтахім".


С.Сідорскі запатрабаваў ад міністэрстваў і ведамстваў канкрэтных дзеянняў па выхаду на дадатнае сальда знешняга гандлю

1 2 3
Прэм'ер-міністр Рэспублікі Беларусь Сяргей Сідорскі запатрабаваў ад міністэрстваў і ведамстваў канкрэтных дзеянняў па выхаду на дадатнае сальда знешняга гандлю. Такія патрабаванні ён агучыў 23 лістапада на пасяджэнні Прэзідыума Саўміна ў Мінску.

Кіраўнік Урада нагадаў, што "аб'ём у валюце вызначаны – у якім калідоры кожнае міністэрства павінна працаваць". Пры гэтым Прэм'ер-міністр запатрабаваў ад міністэрстваў і ведамстваў канкрэтных дакументаў па выхаду на дадатнае сальда. У іх павінна быць распісана, што будзе зроблена і за кошт чаго дасягнута, без усялякіх агульных разважанняў, падкрэсліў ён.

Сяргей Сідорскі дадаў, што выхад на дадатнае сальда знешняга гандлю – адна з галоўных задач. "Усе вобласці, аблвыканкамы ўзгаднілі на працягу 2010 года стратэгіі эканамічнага развіцця па выхаду на дадатнае сальда. Цяпер я патрабую, каб быў дакладна распісаны па кожнаму году рух", – сказаў ён. Пры гэтым Прэм'ер-міністр адзначыў некаторыя праблемы, якія ўзнікаюць у міністэрстваў па гэтым пытанні. "Мне зноў дакладваюць, што Мінпрам не можа знайсці $1 млрд. Я не збіраюся вяртацца да таго, што мы абмяркоўвалі тут раней, для гэтага ёсць міністэрствы, прадпрыемствы, у міністэрстваў ёсць падгаліны, – падкрэсліў Сяргей Сідорскі. – Разглядайце, сядайце, працуйце".

Прэм'ер-міністр дадаў, што прыняў рашэнні, згодна з якімі гэтыя пытанні будуць разглядацца ва ўрадзе. "Міністр эканомікі будзе запрашаць сваіх спецыялістаў, будуць запрашацца і іншыя міністры. Я падпісаў графікі, звод вашай работы будзе кантраляваць віцэ-прэм'ер Андрэй Кабякоў, – сказаў Сяргей Сідорскі. – Але працаваць за міністраў я не маю намеру. Параметры вызначаны, калі камусьці нешта незразумела, прыйдзіце, спытайце, але, на мой погляд, тут поўная зразумеласць. Дакументы падпісаны і пасля заканчэння пяцігодкі і па 2011 году па двух гэтых напрамках – прагнозу сацыяльна-эканамічнага развіцця і выхаду на дадатнае сальда, што мы павінны зрабіць".

Таксама на Прэзідыўме быў разгледжаны праект дзяржаўнай праграмы развіцця чыгуначнага транспарту ў Беларусі на 2011-2015 гады, якую прадставіў Міністр транспарту і камунікацый Іван Шчэрба.

Паводле яго слоў, на выкананне дзяржпраграмы плануецца накіраваць Br14,6 трлн. Фінансаваць дзяржпраграму прадугледжваецца за кошт уласных сродкаў Беларускай чыгункі (39 працэнтаў ад агульнага аб'ёму фінансавання), крэдытаў банкаў (57,6 працэнта), сродкаў рэспубліканскага і мясцовых бюджэтаў (3,4 працэнта), у тым ліку інавацыйнага фонду Мінтранса.

Іван Шчэрба адзначыў, што асноўны акцэнт у праграме зроблены на развіццё інфраструктуры і абнаўленне рухомага саставу. Галоўная мэта праграмы – развіццё чыгуначнага транспарту як адной з важнейшых умоў устойлівага развіцця краіны, поўнае транспартнае забеспячэнне патрэбнасцей насельніцтва і прадпрыемстваў матэрыяльнай сферы. У ліку задач – гарантаванне бяспекі руху паяздоў, развіццё і мадэрнізацыя чыгуначнай інфраструктуры, абнаўленне цягавага і маторвагоннага рухомага саставу, удасканаленне дзеючых тэхналогій перавозкі грузаў і пасажыраў.

Пры рэалізацыі праграмы запланавана выкананне інвестыцыйных праектаў, у лік якіх уваходзіць набыццё цягавага і маторвагоннага рухомага саставу – 30 электравозаў для грузавога руху, 24 электравозы і 8 цеплавозаў для пасажырскага руху, 6 манеўровых цеплавозаў, 29 электрапаяздоў, 20 дызель-паяздоў, 182 пасажырскія вагоны і 10 тыс. грузавых вагонаў.

Плануецца электрыфікацыя чыгуначных ліній на ўчастках Асіповічы – Гомель, Жлобін – Калінкавічы, Маладзечна – дзяржграніца. Гэта дасць магчымасць пашырыць палігон функцыянавання электрыфікаванай сеткі ў 9-м транспартным калідоры, знізіць экалагічную нагрузку на прылеглыя да чыгункі тэрыторыі і сабекошт перавозак грузаў і пасажыраў. Будзе развівацца Мінскі чыгуначны вузел, удасканальвацца ўнутрыгарадскія чыгуначныя перавозкі пасажыраў у Мінску, з'явяцца дадатковыя галоўныя пуці на падыходах да станцыі Мінск-Пасажырскі і на абходах Мінска.

Асаблівая ўвага будзе ўдзелена развіццю скорасных міжрэгіянальных пасажырскіх зносін. Скорасць руху пасажырскіх паяздоў плануецца павысіць да 140-160 км/гадз. Рэалізацыя праекта скароціць працягласць знаходжання пасажыраў у шляху паміж абласнымі цэнтрамі і Мінскам на 1-2 гадзіны адносна існуючага часу руху. Напрыклад, ад Мінска да Брэста можна будзе даехаць за 2 гадзіны 40 хвілін.

Вырашэнне задач новай дзяржпраграмы павінна забяспечыць да 2015 года рост асноўных паказчыкаў развіцця чыгуначнага транспарту, падкрэсліў міністр. "Так, аб'ёмы перавозак грузаў узрастуць на 127,6 працэнта, у тым ліку прырост транзіту прагназуецца на ўзроўні 144,8 працэнта, увозу – 158,4 працэнта, вывазу – 120,1 працэнта", – праінфармаваў ён. Тэмп росту валавога ўнутранага прадукту галіны складзе 168 працэнтаў, сальда знешняга гандлю – 304,2 працэнта (Br752,2 млн.). Тэмп росту прадукцыі прамысловасці дасягне 183,7 працэнта, прадукцыйнасці працы – 175,7 працэнта.

Прэм'ер-міністр Сяргей Сідорскі запатрабаваў асаблівую ўвагу ў новай праграме ўдзяліць імпартазамяшчэнню. Паводле яго слоў, няма неабходнасці закупляць за мяжой тое, што можна вырабляць у Беларусі.