| |
Беларусь у студзені-лістападзе 2009 года гандлявала са 180 краінамі свету
Беларусь у студзені-лістападзе 2009 года ажыццяўляла экспартна-імпартныя аперацыі са 180 краінамі свету. Тавары пастаўляліся на рынкі 139 дзяржаў, імпартавалася прадукцыя са 168 краін.
Геаграфія беларускіх паставак у параўнанні з пачаткам 2009 года пашыралася. У студзені мінулага года Беларусь гандлявала са 127 краінамі, экспарт ажыццяўляўся на рынкі 86 дзяржаў, імпарт - са 118 краін.
Асноўнымі гандлёвымі партнёрамі Беларусі ў студзені-лістападзе 2009 года былі Расія (47,3 працэнта ўсяго аб'ёму тавараабароту), Нідэрланды (7,7 працэнта), Германія (6,3 працэнта), Украіна (6,1 працэнта), Латвія (3,5 працэнта), Польшча (3,2 працэнта), Кітай (2,5 працэнта), Злучанае Каралеўства (2,1 працэнта), а таксама Італія, Бразілія і Індыя.
Пастаўкі беларускіх тавараў у Расію па выніках 11 месяцаў 2009 года ў параўнанні з аналагічным перыядам 2008 года скараціліся на 39,5 працэнта да $6,039 млрд. і склалі ў аб'ёме экспарту рэспублікі 31,7 працэнта. Экспарт у Нідэрланды зменшыўся на 36,7 працэнта да $3,234 млрд. Наступствы сусветнага крызісу паўплывалі на гандаль Беларусі і з многімі іншымі краінамі. Так, беларускі экспарт ва Украіну ў студзені-лістападзе склаў $1,543 млрд., або 57 працэнтаў да аналагічнага перыяду 2008 года, у Латвію - $1,445 млрд. (70,8 працэнта), Літву - $336 млн. (57,8 працэнта), Польшчу - $732,9 млн. (42,4 працэнта). У той жа час ёсць і станоўчыя тэндэнцыі: экспартныя пастаўкі ў Германію за 11 месяцаў узраслі на 12,4 працэнта да $862,9 млн., у Індыю - на 61,9 працэнта да $473,9 млн.
Аб'ём знешняга гандлю таварамі Беларусі ў студзені-лістападзе 2009 года склаў $44,487 млрд., або 65,9 працэнта да ўзроўню аналагічнага перыяду 2008 года. У тым ліку экспарт тавараў знізіўся да $19,06 млрд. (61,6 працэнта да студзеня-лістапада 2008 года), імпарт - да $25,427 млрд. (69,6 працэнта). Па выніках 11 месяцаў 2009 года сальда знешняга гандлю таварамі Беларусі склалася адмоўнае ў памеры $6,367 млрд.
| |
© 2005-2009 Апарат Савета Міністраў Рэспублікі Беларусь
Пры выкарыстанні інфармацыі спасылка на друкаваную крыніцу з`яўляецца абавязковай
Інфармацыйная падтрымка УП "Беларускае тэлеграфнае агенцтва"
|
|
|