| |
АСНОЎНЫМ КАТЭГОРЫЯМ ПЕДРАБОТНІКАЎ ЗАХАВАНЫ ВОДПУСК 56 КАЛЯНДАРНЫХ ДЗЁН
Асноўным катэгорыям педработнікаў захаваны асноўны водпуск працягласцю 56 каляндарных дзён. Такое рашэнне змяшчаецца ў Пастанове Савета Міністраў нумар 100 "Аб прадастаўленні асноўнага водпуску працягласцю больш як 24 дні".
Згодна з дакументам, водпуск у памеры 56 дзён захаваны настаўнікам і педагогам агульнаадукацыйных устаноў, ПТВ, ССНУ і ВНУ, санаторных дашкольных устаноў, дапаможных школ (школ-інтэрнатаў), цэнтраў карэкцыйна-развіваючага навучання і рэабілітацыі, міжшкольных вучэбна-вытворчых камбінатаў працоўнага навучання і прафесійнай арыентацыі навучэнцаў, цэнтраў дапрызыўной падрыхтоўкі, устаноў, якія забяспечваюць атрыманне сярэдняй спецыяльнай і прафесійна-тэхнічнай адукацыі, спецыяльных вучэбна-выхаваўчых, лячэбна-выхаваўчых, сацыяльна-педагагічных устаноў.
Астатнім катэгорыям - кіраўнікам, выхавацелям, метадыстам, музычным работнікам і кіраўнікам фізічнага выхавання ў дашкольных установах (акрамя спецыяльных або санаторных дашкольных устаноў (або груп) для дзяцей, хворых на туберкулёз і якія перанеслі анкагематалагічныя захворванні) - будзе прадастаўлены водпуск у памеры 30 каляндарных дзён. Такі ж водпуск прадастаўляецца загадчыкам вучэбна-метадычных кабінетаў, вучэбных лабараторый, выхавацелям, кіраўнікам гурткоў (клубаў па інтарэсах, калектываў аматарскіх аб'яднанняў, секцый, студый і іншых), канцэртмайстрам, акампаніятарам і метадыстам.
Пастанова захоўвае таксама вялікую працягласць працоўнага водпуску (больш як 24 рабочыя дні) для моладзі да 18 гадоў, работнікаў аварыйна-выратавальных службаў, інвалідаў і тых, хто працуе на тэрыторыях, якія пацярпелі ад аварыі на Чарнобыльскай АЭС.
| |
© 2005-2008 Апарат Савета Міністраў Рэспублікі Беларусь
Пры выкарыстанні інфармацыі спасылка на друкаваную крыніцу з`яўляецца абавязковай
Інфармацыйная падтрымка УП "Беларускае тэлеграфнае агенцтва"
|
|
|
Устойлівасць беларускай эканомікі - у стварэнні экспартаарыентаваных вытворчасцей. Такую думку выказаў Прэм'ер-міністр Беларусі Сяргей Сідорскі на ўрачыстай цырымоніі пуску ў эксплуатацыю другой тэхналагічнай лініі па вытворчасці мінералаватных вырабаў на аснове базальтавага валакна ў ААТ "Гомельбудматэрыялы". Чым больш у рэспубліцы будзе такіх вытворчасцей, тым хутчэй і прасцей будзе пераадольваць уплыў негатыўных з'яў на сусветным рынку. Увод у эксплуатацыю новай лініі дасць магчымасць у поўным аб'ёме забяспечыць будаўнічую галіну рэспублікі сучаснымі цеплаізаляцыйнымі плітамі, а таксама пастаўляць частку прадукцыі на экспарт.
Урад Беларусі павялічыў квоты на вытворчасць у 2008 годзе тытунёвых вырабаў з 19 млрд. штук да 19,5 млрд. штук. Такое рашэнне змяшчаецца ў Пастанове Савета Міністраў ад 18 лістапада нумар 1736.
Беларусь акажа Кубе гуманітарную дапамогу ў сувязі са стыхійным бедствам, якое спасцігла гэту краіну. Міністэрству фінансаў пастановай Савета Міністраў прадпісана выдзеліць у 2008 годзе Міністэрству замежных спраў для пасольства Беларусі ў Кубе з рэспубліканскага бюджэту за кошт сродкаў фонду фінансавання расходаў, звязаных са стыхійнымі бедствамі, аварыямі і катастрофамі, 30 тыс. еўра на аказанне гуманітарнай дапамогі Кубе.
У план прыватызацыі аб'ектаў, якія знаходзяцца ў рэспубліканскай уласнасці, на 2008-2010 гады ўнесены змяненні. Такое рашэнне прынята Пастановай Савета Міністраў нумар 1709.
Кантроль за працоўнай дзейнасцю нядбайных бацькоў у бліжэйшы час будзе ўзмоцнены. Аб гэтым Намеснік Прэм'ер-міністра Беларусі Аляксандр Косінец заявіў сёння ў Мінску ў час сустрэчы з бацькамі, чые дзеці знаходзяцца на дзяржаўным выхаванні.
Беларускі інвестыцыйны форум пачаўся ў
канферэнц-цэнтры Чэрч Хаўз у Лондане. Яго работу ўзначальвае Прэм'ер-міністр Беларусі Сяргей Сідорскі.
У Беларусі пераносяцца рабочыя дні ў снежні бягучага года і ў студзені 2009 года. Такое рашэнне прадугледжана пастановай Савета Міністраў нумар 1720 ад 15 лістапада 2008 года.
У 2008 годзе ў сельскай гаспадарцы будуць выкананы ўсе прагнозныя паказчыкі, акрамя вытворчасці малака. Аб гэтым заявіў сёння першы віцэ-прэм'ер Уладзімір Сямашка на пасяджэнні Прэзідыума Савета Міністраў, дзе абмяркоўваўся ход выканання Дзяржаўнай праграмы адраджэння і развіцця вёскі на 2005-2010 гады па выніках работы за 9 месяцаў, а таксама меры па ліквідацыі дапушчанага адставання пры рэалізацыі мерапрыемстваў гэтай праграмы.
Беларусь разглядае магчымасць прыцягнення замежных кампаній у сферу страхавання жыцця. Аб гэтым паведаміў сёння ў Лондане журналістам віцэ-прэм'ер Беларусі Андрэй Кабякоў. Ён адзначыў, што размова ідзе аб страхавых кампаніях - рэзідэнтах Беларусі. "Гэта прынцыповая пазіцыя", - падкрэсліў ён.