УРАД АДЗНАЧАЕ ПРАГРЭС У РАБОЦЕ ПА ІМПАРТАЗАМЯШЧЭННЮ Ў БЕЛАРУСІ.

Першы намеснік Прэм'ер-міністра Уладзімір Сямашка адзначае прагрэс у рабоце па імпартазамяшчэнню ў Беларусі. У краіне рэалізуюцца дзяржаўная, галіновыя, рэгіянальныя праграмы, праекты прадпрыемстваў па арганізацыі вытворчасці імпартазамяшчальных дэталей, вузлоў, сістэм, машын, матэрыялаў, канстатаваў Уладзімір Сямашка сёння на пасяджэнні Прэзідыума Савета Міністраў. Напрыклад, патрэбнасць рэспублікі ў камбайнах практычна поўнасцю забяспечваецца за кошт уласных машын. Да 70 працэнтаў бытавой тэхнікі, што рэалізуецца ў Беларусі, вырабляюць айчынныя прадпрыемствы.

У Беларусі асвоена вытворчасць пральных машын, пыласосаў, ЗВЧ-печаў. У гэтай справе, лічыць Уладзімір Сямашка, "нельга ўдавацца ў падрабязнасці, нельга ўсё, да балта, вырабляць у сябе". Наяўнасць імпартнага тавару неабходна, каб у спажыўца быў выбар.

"Напярэдадні развалу СССР Беларусь выпускала не больш за 17 працэнтаў сельскагаспадарчай тэхнікі ад патрэбнасці, - нагадаў Першы намеснік Прэм'ер-міністра. - Сёння айчынныя вытворцы выпускаюць больш за 90 працэнтаў неабходных відаў сельгастэхнікі і агрэгатаў. Калі ўлічыць, што некаторыя імпартныя машыны ў паўтара-два разы даражэйшыя за айчынныя, то тут мы бачым яўны рух наперад". Пры гэтым ён падкрэсліў, што імпартазамяшчэнне - працэс даволі інерцыйны, "ён не вырашаецца за адзін год".

Адзін з найважнейшых складальнікаў пры рэалізацыі імпартазамяшчальных праектаў - зніжэнне сабекошту прадукцыі, адзначыў першы віцэ-прэм'ер. Ён таксама звярнуў увагу на тое, што, купляючы імпартныя камплектуючыя, нашы вытворцы не павінны "прывязвацца да аднаго пастаўшчыка". Іх павінна быць як мінімум 2-3. Гэта павышае якасць і канкурэнтаздольнасць дэталей і вузлоў, якія пастаўляюцца.

У якасці станоўчага прыкладу імпартазамяшчэння Уладзімір Сямашка прывёў Жыткавіцкі маторабудаўнічы завод: ён выпускае масленыя помпы, якія раней даводзілася імпартаваць. Цяпер і прадпрыемства загружана заказамі, і валютныя сродкі эканомяцца.

Малаэфектыўныя праекты павінны быць выключаны з праграм імпартазамяшчэння. Аб гэтым заявіў міністр эканомікі Мікалай Зайчанка на пасяджэнні Прэзідыума Савета Міністраў Беларусі. Ён паведаміў, што Міністэрствам эканомікі падрыхтаваны праект пастановы ўрада, які ўносіць змяненні і дапаўненні ў Пастанову Саўміна ад 24 сакавіка 2006 года нумар 402 "Аб Дзяржаўнай праграме імпартазамяшчэння на 2006-2010 гады". Праект узгоднены з усімі зацікаўленымі, у тым ліку і з Камітэтам дзяржаўнага кантролю. Дакумент накіраваны на далейшае ўдасканаленне дзеючага заканадаўства па пытаннях імпартазамяшчэння, а таксама павышэнне эфектыўнасці рэалізацыі адпаведных праграм.

У прыватнасці, удасканальваецца парадак фарміравання і маніторынгу імпартазамяшчальных праектаў, што дасць магчымасць пазбегнуць, па-першае, уключэння ў праграму малаэфектыўных праектаў, а па-другое, - неабгрунтаванага выключэння іншых. Упарадкуецца працэдура зацвярджэння пералікаў праектаў на чарговы год.

Таксама прадугледжваецца на працягу трох гадоў праводзіць маніторынг завершаных праектаў. Дзяржаўныя органы абавязаны будуць заключаць з выканаўцамі імпартазамяшчальных праектаў, фінансаванне якіх ажыццяўляецца за кошт бюджэтных сродкаў, дагаворы, у якіх агавораны ўмовы вяртання сродкаў у выпадку нямэтавага і неэфектыўнага іх выкарыстання.

Для ўдасканалення ацэнкі эфектыўнасці рэалізацыі праграм прапануецца дапоўніць справаздачу аб рэалізацыі імпартазамяшчальных праектаў новым паказчыкам: "доля імпартнай сыравіны, матэрыялаў, камплектуючых, выкарыстаных для вытворчасці імпартазамяшчальнай прадукцыі". Гэта неабходна для таго, каб разлічваць эканомію валютных рэсурсаў у выніку рэалізацыі такіх праграм, падкрэсліў Мікалай Зайчанка.

Прадугледжана, што кантраляваць выкананне імпартазамяшчальных праграм будзе Камісія па канкурэнтаздольнасці эканомікі пры Савеце Міністраў.

Імпартазамяшчальныя праекты павінны рэалізоўвацца без адміністрацыйнага націску. "У рэспубліцы неабходна стварыць агульнасістэмныя меры, якія будуць садзейнічаць як развіццю імпартазамяшчэння, так і павышэнню канкурэнтаздольнасці эканомікі краіны", - адзначыў Мікалай Зайчанка. Пры гэтым імпартазамяшчэнне не павінна быць самамэтай, а галоўным крытэрыем у рэалізацыі такіх праектаў павінны быць эканамічныя механізмы і павышэнне канкурэнтаздольнасці. "Усё гэта неабходна ўлічваць у далейшым пры рэалізацыі праграм", - падкрэсліў міністр эканомікі. Ён дадаў, што пры выпуску імпартазамяшчальнай прадукцыі тэхнічныя параметры павінны быць не горшыя, чым у замежных аналагаў.

Мікалай Зайчанка таксама паведаміў, што ў міністэрствах і ведамствах прайшлі калегіі і пасяджэнні, на якіх абмеркаваны і прааналізаваны заўвагі і прапановы Камітэта дзяржаўнага кантролю па рэалізацыі праграм імпартазамяшчэння. У Міністэрстве прамысловасці і ў канцэрне "Белнафтахім" ужо намецілі план мерапрыемстваў па ўстараненню выяўленых недахопаў, дэталёва прапрацавалі імпартазамяшчальныя праекты з правядзеннем іх тэхніка-эканамічнага абгрунтавання.

ВЫДАННІ САВЕТА МІНІСТРАЎ РЭСПУБЛІКІ БЕЛАРУСЬ

ІНТЭРНЭТ-РЭСУРСЫ