ТЭМП РОСТУ ПАСЛУГ У БЕЛАРУСІ Ў 2009-2010 ГАДАХ ПАВІНЕН ДАСЯГНУЦЬ У СЯРЭДНІМ 120 ПРАЦЭНТАЎ

Тэмп росту ў сферы паслуг Беларусі ў 2009-2010 гадах павінен дасягнуць у сярэднім 120 працэнтаў. Аб гэтым заявіў Першы намеснік Прэм'ер-міністра Беларусі Уладзімір Сямашка сёння на пасяджэнні Прэзідыума Савета Міністраў, на якім разгледжаны ход выканання Комплекснай праграмы развіцця сферы паслуг у Рэспубліцы Беларусь на 2006-2010 гады. Ён адзначыў, што ставіцца задача забяспечыць апераджальнае развіццё сферы паслуг адносна прамысловага сектара. Доля сферы паслуг у ВУП у развітых краінах складае да 70 працэнтаў і больш.

У Беларусі за 2007 год гэты паказчык быў на ўзроўні 40,9 працэнта пры заданні 42-43 працэнты.

"Цяглавым канём нашай эканомікі ў папярэднія гады і па выніках 5 месяцаў бягучага года застаецца прамысловасць", - адзначыў Уладзімір Сямашка. Так, тэмп росту ВУП у студзені-маі склаў 110,4 працэнта, прамысловай вытворчасці - 113,3 працэнта. "Неабходна пераламаць сітуацыю, каб выйсці ў 2009-2010 гадах у сярэднім на 120 працэнтаў па развіццю сферы паслуг", - падкрэсліў першы віцэ-прэм'ер.

Удзельная вага сферы паслуг у структуры ВУП у 2010 годзе павінна дасягнуць 46-48 працэнтаў, колькасць занятых у гэтай галіне - 57-58 працэнтаў ад агульнай колькасці занятых у эканоміцы.

Як паведаміў міністр эканомікі Мікалай Зайчанка, экспарт паслуг у Беларусі ў 2009 годзе ўзрасце не менш як на 20 працэнтаў у параўнанні з бягучым годам. Паводле яго слоў, ставяцца павышаныя задачы па развіццю сферы паслуг, якая "павінна стаць лакаматывам эканомікі". Тэмпы росту экспарту паслуг у 2009-2010 гадах чакаюцца на ўзроўні не менш як 120 працэнтаў, падкрэсліў Мікалай Зайчанка.

Міністр адзначыў, што ў бягучым годзе Комплексная праграма была скарэкціравана ў бок павелічэння і ў яе дабаўлены заданні па развіццю асобных відаў паслуг. "У цэлым экспарт паслуг за пяцігоддзе павінен узрасці на 243 працэнты", - сказаў ён. Павышаны заданні па аказанню страхавых паслуг, росту аб'ёмаў выручкі ад перавозак грузаў, перагледжаны паказчыкі па аказанню платных паслуг насельніцтву ў цэлым.

У 2007 годзе ў рэспубліцы забяспечана дынамічнае развіццё сферы паслуг, выканана заданне па росту іх экспарту, сказаў Мікалай Зайчанка. Забяспечаны рост аб'ёмаў выручкі ад перавозкі грузаў і пасажыраў усімі відамі транспарту, ад паслуг сувязі, банкаўскіх і іншых. Найбольш высокімі тэмпамі ў 2007 годзе сфера платных паслуг развівалася ў Мінску, на долю якога прыпадае каля 35 працэнтаў усяго аб'ёму платных паслуг, што аказваюцца насельніцтву ў Беларусі.

Разам з тым удзельная вага сферы паслуг у ВУП Беларусі ў 2007 годзе склала 40,9 працэнта, што ніжэй за ўстаноўлены паказчык па Комплекснай праграме (43-44 працэнты). Гэта звязана з апераджальнымі тэмпамі росту дабаўленай вартасці ў сферы вытворчасці тавараў у параўнанні са сферай паслуг, растлумачыў Мікалай Зайчанка. У сувязі з гэтым у рэспубліцы будуць прыняты меры для апераджальнага развіцця сферы паслуг. "Тэмпы росту вытворчасці ў сферы паслуг у 2009-2010 гадах павінны скласці каля 119-120 працэнтаў, што істотна апярэджвае тэмпы росту вытворчасці тавараў", - сказаў Мікалай Зайчанка.

Міністр эканомікі адзначыў той факт, што ў мінулым годзе не ў поўным аб'ёме выканалі заданні Мінтранс па росту аб'ёмаў перавозак грузаў паветраным транспартам, Мінспорту - па платных паслугах насельніцтву ў сферы фізкультуры і спорту, Мінфін - па аказанню страхавых паслуг юрыдычным і фізічным асобам, Дзяржкаммаёмасць - па паслугах з аперацыямі з нерухомай маёмасцю. У сувязі з гэтым у бягучым годзе павінны быць прыняты меры для выхаду на запланаваныя паказчыкі па аб'ёму гэтых паслуг.

Міністр таксама адзначыў, што сферу дзелавых паслуг у Беларусі трэба развіваць больш актыўна, бо пакуль што гэты сектар не адпавядае патрабаванням эканомікі.

"Цяпер у Беларусі актыўна развіваюцца банкаўскія паслугі, чаго нельга сказаць аб рыэлтарскіх і страхавых", - сказаў Мікалай Зайчанка. Паводле яго слоў, у адпаведнасці з комплекснай праграмай пастаўлена задача па павелічэнню аб'ёму рыэлтарскіх паслуг, што аказваюцца арганізацыямі дзяржаўнай формы ўласнасці. Асноўню долю (90,7 працэнта) гэтых паслуг па-ранейшаму аказваюць прыватныя кампаніі.

Міністр эканомікі таксама падкрэсліў, што перад Міністэрствам фінансаў стаяць задачы стварэння найбольш выгадных умоў добраахвотнага страхавання для страхавальнікаў і поўнага ахопу аб'ектаў, якія падлягаюць абавязковаму страхаванню.

Асаблівую ўвагу ў рэспубліцы неабходна ўдзяліць таксама развіццю транспартных паслуг, жыллёва-камунальных, паслуг сувязі, таму што яны займаюць істотную долю ў агульным аб'ёме платных паслуг насельніцтву. "Мінтранс павінен прааналізаваць сітуацыю з аказаннем паслуг пасажырскага транспарту і забяспечыць тэмп росту платных паслуг насельніцтву ў бягучым годзе не менш як 112 працэнтаў, каб перакрыць страты аб'ёму па паветранаму транспарту", - сказаў міністр эканомікі. На яго думку, неабходна больш актыўна павялічваць аб'ём аказання платных паслуг праз аб'екты прыдарожнага сэрвісу (у першым квартале бягучага года тэмп росту гэтых паслуг склаў 102,4 працэнта).

Значны патэнцыял па нарошчванню аб'ёму паслуг ёсць таксама ў сістэме Мінсувязі. Так, з прычыны насычэння рынку паслугамі сотавай сувязі, неабходна прыняць дадатковыя меры па развіццю сеткі Інтэрнэт, у тым ліку ў сельскай мясцовасці. "Доля даходаў ад паслуг сувязі юрыдычным і фізічным асобам, атрыманых ад доступу да сеткі Інтэрнэт, складае пакуль што толькі 4,8 працэнта", - сказаў міністр эканомікі.

Паводле яго слоў, у жыллёва-камунальнай гаспадарцы Беларусі таксама ёсць перадумовы для выканання прагнозных паказчыкаў па росту платных паслуг. Штогадовы рост уводу жылля ў рэспубліцы павінен адбівацца і на павелічэнні спажывання жыллёва-камунальных паслуг, лічыць Мікалай Зайчанка. Ён растлумачыў, што спасылкі на тое, што насельніцтва актыўна ўстанаўлівае прыборы ўліку вады і газу і за кошт гэтага зніжае спажыванне паслуг, не заўсёды апраўданыя. З уводам новых кватэр павялічваюцца продажы пральных машын і іншай складанай бытавой тэхнікі, і адпаведна расце спажыванне насельніцтвам электраэнергіі і вады.

ВЫДАННІ САВЕТА МІНІСТРАЎ РЭСПУБЛІКІ БЕЛАРУСЬ

ІНТЭРНЭТ-РЭСУРСЫ