ПАСЯДЖЭННЕ САВЕТА КІРАЎНІКОЎ УРАДАЎ КРАІН СНД

Беларусь і Туркменістан разглядаюць варыянты супрацоўніцтва ў галіне паставак беларускай сельгастэхнікі

Беларусь і Туркменістан разглядаюць варыянты супрацоўніцтва ў галіне паставак беларускай сельгастэхнікі. Як заявіў сёння Прэзідэнт Туркменістана Гурбангулы Бердымухамедаў на сустрэчы з Кіраўнікамі Урадаў дзяржаў - удзельніц СНД у Ашхабадзе, Туркменістан мае намер актыўна рэфармаваць сельскагаспадарчую вытворчасць і зацікаўлены ў пастаўцы новай сельгастэхнікі. Ён адзначыў, што па гэтаму пытанню ў Туркменістана ёсць добрыя пачынанні з Беларуссю.

21 лістапада адбылася сустрэча Прэм'ер-міністра Беларусі Сяргея Сідорскага з Прэзідэнтам Туркменістана Гурбангулы Бердымухамедавым. Сустрэча праходзіла ў закрытым фармаце.

У цэлым Прэзідэнт Туркменістана выказаў упэўненасць у дасягненні плённых вынікаў пасяджэння Савета Кіраўнікоў Урадаў краін - удзельніц СНД. Пры гэтым ён падкрэсліў, што найбольшай увагі заслугоўваюць пытанні супрацоўніцтва ў эканамічнай сферы.

Беларусь вядзе перагаворы аб магчымым удзеле ў здабычы газу ў Туркменістане - С.Сідорскі

Беларусь вядзе перагаворы аб магчымым удзеле ў здабычы газу ў Туркменістане. Аб гэтым паведаміў сёння журналістам Прэм'ер-міністр Беларусі Сяргей Сідорскі.

Паводле яго слоў, "Белтрансгаз" і іншыя беларускія кампаніі вядуць такія перагаворы, аднак яны пакуль што не даюць чаканага выніку.

Як паведамлялася, 21 лістапада Сяргей Сідорскі сустрэўся з Прэзідэнтам Туркменістана Гурбангулы Бердымухамедавым. Яны абмеркавалі пытанні супрацоўніцтва ў нафтагазавай сферы. Прэм'ер-міністр адзначыў, што для Туркменістана сёння актуальнае пытанне сэрвіснага абслугоўвання існуючых свідравін. Беларускія прадпрыемствы маюць вялікі вопыт работы ў гэтай галіне. У бліжэйшай перспектыве ў гэтай краіне плануецца адкрыць прадстаўніцтва адпаведнай беларускай кампаніі, якая будзе займацца арганізацыяй праекта.

Сяргей Сідорскі праінфармаваў таксама, што кампанія "Беларуснафта" прапанавала пабудаваць у Туркменістане завод па вытворчасці метанолу. "Праект па будаўніцтву завода, а таксама выхад на дзеючыя свідравіны, дасць магчымасць замацавацца на гэтым рынку", - сказаў ён. Беларусь ужо прадаставіла праекты і чакае рашэння з боку Туркменістана.

Беларусь у бягучым годзе паставіць у Туркменістан больш як 2,7 тыс. трактароў

Беларусь у бягучым годзе паставіць у Туркменістан больш як 2,7 тыс. трактароў. Аб гэтым паведаміў сёння журналістам Прэм'ер-міністр Беларусі Сяргей Сідорскі, каменціруючы вынікі праведзенай 21 лістапада ў Ашхабадзе сустрэчы з Прэзідэнтам Туркменістана Гурбангулы Бердымухамедавым.

У наступным годзе Беларусь плануе павялічыць пастаўкі ў Туркменістан "МАЗаў", збожжаўборачнай і іншай тэхнікі, паколькі ў краіне рэалізуецца праграма па развіццю сельгасвытворчасці, якая прадугледжвае абнаўленне парку тэхнікі.

Ацэньваючы ў цэлым гандлёва-эканамічнае супрацоўніцтва Беларусі і Туркменістана, Сяргей Сідорскі падкрэсліў, што ўзровень дасягнутага тавараабароту $70 млн. недастатковы. "Гэта лічба абавязвае весці актыўныя перагаворы па развіццю экспарту беларускай прадукцыі", - сказаў ён.

Паводле слоў Сяргея Сідорскага, на сустрэчы таксама абмяркоўваліся пытанні супрацоўніцтва ў будаўнічай галіне. У прыватнасці, разглядалася магчымасць работы спецыялістаў беларускіх праектных інстытутаў у Туркменістане. Бакі таксама абмеркавалі перспектывы ўзаемадзеяння ў нафтагазавай сферы.

Стратэгія развіцця харчовага рынку СНД будзе распрацавана ў бліжэйшы час

Стратэгія развіцця харчовага рынку СНД будзе распрацавана ў бліжэйшы час. Як паведаміў сёння журналістам Прэм'ер-міністр Беларусі Сяргей Сідорскі, пытанні забеспячэння харчовай бяспекі дзяржаў - удзельніц СНД з'яўляюцца актуальнымі. Гэта звязана з сусветнымі тэндэнцыямі росту цэн на збожжа, прадукцыю жывёлагадоўлі.

У сувязі з гэтым, паводле слоў Сяргея Сідорскага, трэба скаардынаваць харчовую праграму ў рамках СНД, каб пазней грунтоўна далажыць Кіраўнікам дзяржаў СНД прапановы па фарміраванню адзінага рынку харчавання ў Садружнасці. Сёння на пасяджэнні Савета Кіраўнікоў Урадаў дзяржаў - удзельніц СНД было прынята рашэнне аб стварэнні рабочай групы ў складзе кіраўнікоў міністэрстваў АПК для распрацоўкі стратэгіі развіцця харчовага рынку Садружнасці.

Сяргей Сідорскі таксама праінфармаваў аб тым, што па ініцыятыве беларускага боку на сённяшнім пасяджэнні Савета Кіраўнікоў Урадаў дзяржаў - удзельніц СНД было ўзнята пытанне далейшага развіцця эканамічнай інтэграцыі ў Садружнасці. У выніку дасягнута дамоўленасць стварыць рабочую групу пры Эканамічным савеце СНД, якая на працягу бліжэйшых двух-трох месяцаў прадставіць канкрэтную праграму па далейшаму эканамічнаму развіццю Садружнасці.

Акрамя таго, на пасяджэнні абмеркаваны пытанні супрацоўніцтва ў транспартнай сферы, міграцыйнай палітыцы. Усяго было разгледжана больш як 30 важнейшых дакументаў.

У сённяшнім пасяджэнні прынялі ўдзел прадстаўнікі ўсіх 12 дзяржаў - удзельніц СНД.

Па ініцыятыве беларускага боку наступнае пасяджэнне Савета Кіраўнікоў Урадаў дзяржаў - удзельніц Садружнасці плануецца правесці ў маі 2008 года ў Мінску.

ВЫДАННІ САВЕТА МІНІСТРАЎ РЭСПУБЛІКІ БЕЛАРУСЬ

ІНТЭРНЭТ-РЭСУРСЫ