НАВІНЫ

Параметры павелічэння колькасці занятых у эканоміцы павінны быць максімальныя

Праект Дзяржаўнай праграмы садзейнічання занятасці насельніцтва Рэспублікі Беларусь на 2009-2010 гады неабходна збалансаваць з іншымі дзяржпраграмамі. Такую задачу паставіў сёння на пасяджэнні Прэзідыума Савета Міністраў Прэм'ер-міністр Сяргей Сідорскі ў ходзе абмеркавання праекта дзяржпраграмы садзейнічання занятасці."Праграма садзейнічання занятасці - вяршыня піраміды, - сказаў Сяргей Сідорскі. - Яна павінна вянчаць сабой усе ўжо прынятыя і рэалізуемыя дзяржаўныя праграмы ў плане напаўнення кадрамі дзеючых прадпрыемстваў і наваствораных".

Прэм'ер-міністр асаблівую занепакоенасць выказаў наконт кадравай сітуацыі ў будаўнічай галіне. "Прынята франтальная праграма мадэрнізацыі галіны, у яе будуць укладзены вялікія фінансавыя сродкі. Без якаснага і колькаснага павелічэння кадравага патэнцыялу, без вяртання з-за мяжы кваліфікаваных будаўнічых кадраў рэалізаваць гэту праграму будзе вельмі складана, праблематычным стане і выкананне заданняў па будаўніцтву жылля ў рэспубліцы", - падкрэсліў ён.

Акрамя таго, у Беларусі рэалізуецца інавацыйная праграма, у адпаведнасці з якой у краіне ідзе маштабная мадэрнізацыя прамысловых прадпрыемстваў і арганізуюцца новыя вытворчасці. І гэтыя прадпрыемствы павінны быць укамплектаваны прафесіянальнымі кадрамі, падкрэсліў кіраўнік Урада.

Асаблівую ўвагу Сяргей Сідорскі ўдзяліў рэалізацыі праграмы развіцця малых і сярэдніх гарадоў. Размова ідзе аб планах па стварэнню ў такіх рэгіёнах рабочых месц, новых вытворчасцей.

Міністр працы і сацыяльнай абароны Уладзімір Патупчык назваў асноўныя прыярытэты праекта праграмы: гэта ўключэнне ў эканамічную дзейнасць незанятага насельніцтва, стварэнне рабочых месц, павышэнне якасці працоўных рэсурсаў, зніжэнне дысбалансу попыту і прапанавання рабочай сілы, вырашэнне праблем занятасці для пэўных груп насельніцтва, паляпшэнне сітуацыі ў сферы занятасці ў шэрагу рэгіёнаў, малых гарадоў, сельскай мясцовасці. Так, праектам праграмы прадугледжваецца стварэнне больш як 160 тыс. рабочых месц у год, у тым ліку каля 20 тыс. - у малых гарадах, больш за 12 тыс. - у сельскай мясцовасці.

Праектам дакумента прадугледжваецца комплекс мер па далейшаму зніжэнню беспрацоўя ў сельскай мясцовасці - у 2,3 раза павялічана заданне па арганізацыі новых рабочых месц у вёсцы. Па прапановах аблвыканкамаў у праект праграмы ўключаны 21 малы горад, 17 з якіх паўторна і 4 новыя (Калінкавічы, Смаргонь, Масты, Любань). Такія падыходы да вырашэння праблем занятасці ў канкрэтных малых гарадах, на думку міністра, апраўдалі сябе і даюць пазітыўныя вынікі. Напрыклад, штогадовае ўключэнне ў праграму самых складаных з пункту гледжання занятасці рэгіёнаў з устанаўленнем мэтавых паказчыкаў дало магчымасць знізіць беспрацоўе ў іх за апошнія 3 гады ў два і больш разоў. Як і раней, па кожнаму малому гораду прадугледжаны меры актыўнай палітыкі занятасці, накіраванай на павышэнне эфектыўнасці выкарыстання і развіцця працоўнага патэнцыялу. Рэалізацыя намечаных мер дасць магчымасць знізіць беспрацоўе ў малых гарадах абласцей рэспублікі да 1-0,8 працэнта. Аблвыканкамамі, гар- і райвыканкамамі будуць распрацаваны і прыняты свае мерапрыемствы па забеспячэнню занятасці насельніцтва. Пры гэтым на ўзроўні рэгіёнаў мерапрыемствы будуць дэталізаваны, узаемаўвязаны з праграмай развіцця малых гарадоў. Рэалізацыя закладзеных у праграме мер дасць магчымасць утрымаць беспрацоўе да канца 2009 года ў межах 1,1-1,2 працэнта, да канца 2010 года - 1,0-1,1 працэнта.

Параметры павелічэння колькасці занятых у эканоміцы Беларусі павінны быць максімальныя, заявіў сёння Прэм'ер-міністр Сяргей Сідорскі. Паводле слоў Сяргея Сідорскага, параметр колькасці занятых у эканоміцы павінен быць увязаны і з падрыхтоўкай новых кадраў, і з забеспячэннем іх эфектыўнымі рабочымі месцамі, і з задавальненнем патрэбнасцей усіх галін эканомікі ў рабочых руках.

Паводле слоў міністра працы і сацыяльнай абароны Уладзіміра Патупчыка, упершыню замацоўваюцца такія высокія лічбы прыросту колькасці занятых у эканоміцы - па 120 тыс. чалавек у год.

"Гэты паказчык за жнівень бягучага года склаў 4 млн. 498 тыс. работнікаў пры прагнозе на гэты год - 4460-4535 тыс. чалавек, - праінфармаваў міністр. - Павелічэнне колькасці занятых у эканоміцы да канца 2009 года неабходна забяспечыць да ўзроўню 4650 тыс. чалавек, на канец 2010 года - да 4740-4775 тыс. работнікаў".

Уладзімір Патупчык падкрэсліў, што на будучы год складзены прадуманы баланс попыту і прапанавання рабочай сілы. Існуючыя ў краіне вакансіі і ствараемыя рабочыя месцы дадуць магчымасць працаўладкаваць неабходную колькасць работнікаў - як самастойна шукаючых работу, так і тых, якія вернуцца з-за мяжы з заработкаў (паводле ацэнак, за межамі Беларусі працуюць каля 154 тыс. чалавек).

У сувязі з рэфармаваннем сістэмы агульнай сярэдняй адукацыі ў Беларусі ў 2009 годзе магчымы павялічаны прыкладна ў паўтара раза выхад на рынак працы выпускнікоў базавай і сярэдняй школы. Міністр працы і сацыяльнай абароны Уладзімір Патупчык адзначыў, што асаблівая ўвага ў гэтай праграме ўдзяляецца забеспячэнню занятасці моладзі. Так, праектам дакумента прадугледжваецца магчымасць атрымання кожным маладым чалавекам першаснай прафесійнай падрыхтоўкі. Для гэтага ў першачарговым парадку на прафнавучанне будзе накіроўвацца беспрацоўная моладзь ва ўзросце да 18 гадоў. Далейшае ўдасканаленне атрымае сістэма прафесійнай арыентацыі моладзі, накіраваная на павышэнне прэстыжу рабочых прафесій, сістэма часовай працоўнай занятасці навучэнцаў і студэнтаў, а таксама арганізацыя "маладзёжнай практыкі". Запланавана ўстанаўленне броні прыёму на работу амаль 7 тыс. маладых людзей.

У мэтах павышэння якасці працоўных рэсурсаў на прафесійную падрыхтоўку будуць накіраваны 25 тыс. беспрацоўных, у першую чаргу з ліку моладзі. Пры гэтым з 40 працэнтаў да 45 працэнтаў павялічаны аб'ёмы прафпадрыхтоўкі кадраў пад канкрэтныя заказы наймальнікаў.

На канкрэтызацыю ўсіх пазіцый дадзены адзін тыдзень. У цэлым праект узяты за аснову.

ВЫДАННІ САВЕТА МІНІСТРАЎ РЭСПУБЛІКІ БЕЛАРУСЬ

ІНТЭРНЭТ-РЭСУРСЫ