НАВІНЫ

Пасяджэнне Савета Міністраў Саюзнай дзяржавы

27 чэрвеня 2008 г. у г. Маскве адбылося чарговае пасяджэнне Савета Міністраў Саюзнай дзяржавы. Прэм'ер-міністр Беларусі Сяргей Сідорскі перакананы, што тавараабарот Беларусі і Расіі ў гэтым годзе перасягне рубеж $30 млрд. Аб гэтым ён заявіў сёння ў ходзе сустрэчы са сваім расійскім калегам Уладзімірам Пуціным перад пасяджэннем Савета Міністраў Саюзнай дзяржавы з удзелам членаў дэлегацыі дзвюх краін. Сяргей Сідорскі нагадаў, што ў мінулым годзе беларуска-расійскі тавараабарот дасягнуў $26 млрд., а за чатыры месяцы бягучага года гэты паказчык ужо склаў $11 млрд. Прэм'ер-міністр Беларусі падзякаваў Уладзіміру Пуціну за тую ўвагу, якую ён заўсёды ўдзяляе развіццю беларуска-расійскіх адносін.

"Асабліва за апошнія два-тры гады адбыліся сур'ёзныя зрухі ў гандлёва-эканамічным супрацоўніцтве", - сказаў Сяргей Сідорскі.

Ён адзначыў, што больш актыўна пачалі працаваць беларуска-расійскія двухбаковыя групы, часцей сталі сустракацца міністры дзвюх краін. "Важна, што акрамя прамых паставак прадукцыі мы выходзім на развіццё кааперацыйных сувязей", - дадаў беларускі Прэм'ер-міністр.

На думку Прэм'ер-міністра Беларусі, асноўным вынікам супрацоўніцтва Беларусі і Расіі ў першым паўгоддзі 2008 года стаў рост эканамічнага ўзаемадзеяння.

Сяргей Сідорскі нагадаў, што за 4 месяцы гэтага года беларуска-расійскі тавараабарот павялічыўся на 60 працэнтаў у параўнанні з аналагічным мінулагоднім перыядам. Пры гэтым двухбаковыя адносіны будуюцца не толькі на дагаворных абавязацельствах, але і на развіцці кааперацыі, адзначыў ён. "Больш як 6 тыс. прадпрыемстваў Беларусі і Расіі працуюць у цеснай кааперацыі", - сказаў Сяргей Сідорскі.

Усё гэта сведчыць аб умацаванні эканамічнага супрацоўніцтва Беларусі і Расіі ў рамках Саюзнай дзяржавы, падкрэсліў Прэм'ер-міністр.

У ходзе сустрэчы ў Маскве з Прэм'ер-міністрам Беларусі Сяргеем Сідорскім кіраўнік расійскага Кабінета Міністраў Уладзімір Пуцін заявіў, што беларускі напрамак знешняй палітыкі заўсёды быў асноўным для Расіі, ён застаецца ім і цяпер.

Уладзімір Пуцін падкрэсліў, што Беларусь і Расія прадаўжаюць актыўна працаваць па ўсіх напрамках, перш за ўсё гэта адчуваецца ў гандлёва-эканамічнай сферы. Калі ў мінулым годзе беларуска-расійскі тавараабарот павялічыўся ў параўнанні з 2006 годам на 30 працэнтаў, то за 4 месяцы гэтага года прырост склаў 60 працэнтаў. "Гэта сведчыць аб тым, што нашы намаганні прыносяць рэальныя вынікі", - перакананы Уладзімір Пуцін.

"Нам ёсць чым ганарыцца не толькі ў двухбаковым супрацоўніцтве, але і ў развіцці нашых краін", - сказаў Уладзімір Пуцін, дадаўшы, што Беларусь і Расія ў двухбаковым супрацоўніцтве будуць удзяляць першараднае значэнне як эканоміцы, так і сацыяльнай сферы.

Адкрываючы пасяджэнне Савета Міністраў Саюзнай дзяржавы, Прэм'ер-міністр Беларусі Сяргей Сідорскі падкрэсліў, што Урады дзвюх краін гатовы прадставіць 10-15 праграм у высокатэхналагічных сферах, якія дадуць магчымасць Беларусі і Расіі зрабіць значны прарыў у гэтым напрамку. На думку Прэм'ер-міністра Беларусі, ў рамках Саюзнай дзяржавы актыўна рэалізуюцца вытворчыя праграмы, якія даюць значны эфект.

Па выніках праведзенага пасяджэння Савета Міністраў Саюзнай дзяржавы, Прэм'ер-міністр Беларусі Сяргей Сідорскі заявіў, што бюджэт Саюзнай дзяржавы ў 2009 годзе будзе павялічаны мінімум на 25 працэнтаў.

Сяргей Сідорскі таксама падкрэсліў, што саюзны бюджэт павінен быць напоўнены канкрэтным зместам.

На пасяджэнні саюзнага Саўміна вялікая ўвага была ўдзелена сумесным вытворчым праграмам. "Узаемны тавараабарот павінен быць падмацаваны саюзнымі праграмамі", - сказаў Сяргей Сідорскі. Паводле яго слоў, на пасяджэнні былі разгледжаны новыя праграмы ў сферы мікраэлектронікі, вытворчасці вялікіх інтэгральных схем, кампазіцыйных палімерных матэрыялаў. Абмяркоўваліся таксама транспартныя, мытныя і іншыя пытанні, якія, паводле слоў беларускага прэм'ера, дадуць новы імпульс развіццю інтэграцыйных працэсаў.

Рост ВУП Беларусі ў 2009-2010 гадах запланаваны на ўзроўні 110-112 працэнтаў

Штогадовы тэмп росту валавога ўнутранага прадукту ў Беларусі на 2009-2010 гады запланаваны на ўзроўні 110-112 працэнтаў. Аб гэтым Першы намеснік Прэм'ер-міністра Беларусі Уладзімір Сямашка паведаміў у ходзе сумеснага пасяджэння палат беларускага парламента.

Паводле яго слоў, на такі тэмп росту ВУП арыентаваны сцэнарый прагнозу сацыяльна-эканамічнага развіцця Беларусі на 2009-2010 гады.

Галоўным чынам, тэмп росту ВУП у 2009 годзе прагназуецца забяспечыць за кошт павелічэння аб'ёму вытворчасці ў вядучых галінах эканомікі: прамысловасці, будаўніцтве, гандлі. Пры гэтым асаблівая ўвага будзе ўдзелена рэалізацыі мерапрыемстваў па паскарэнню развіцця сферы паслуг і павелічэнню яе ролі ў фарміравані ВУП, адзначыў Першы віцэ-прэм'ер.

Вызначальную ролю ў прагназуемым эканамічным росце будзе адыгрываць прамысловасць. У 2009 годзе вытворчасць прамысловай прадукцыі павінна павялічыцца на 10,5-12,5 працэнта, а тэмп росту інвестыцый у асноўны капітал прагназуецца на ўзроўні 123-125 працэнтаў. Значны акцэнт будзе зроблены на прыток замежных інвестыцый.

Урад Беларусі распрацоўвае дадатковыя меры для стабілізацыі знешняга гандлю. Уладзімір Сямашка адзначыў, што па выніках чатырох месяцаў бягучага года сальда знешняга гандлю таварамі і паслугамі склала мінус $626,2 млн. "Яго суадносіны знаходзяцца ў дапушчальных прагнозам рамках, але толькі за красавік адмоўнае значэнне ўзрасло на $400 млн. І гэта патрабуе прыняцця неадкладных мер па карэкціроўцы ЗЭД", - сказаў Уладзімір Сямашка.

Паводле яго слоў, урад глыбока прааналізаваў тэндэнцыю росту адмоўнага сальда, прычыны якога звязаны ў асноўным са знешнімі фактарамі. Цяпер у стадыі дапрацоўкі знаходзяцца дадатковыя меры, якія будуць задзейнічаны ў другім паўгоддзі для стабілізацыі знешняга гандлю.

Сцэнарый прагнозу сацыяльна-эканамічнага развіцця Беларусі на 2009-2010 гады прадугледжвае рост заработнай платы ў цэлым па народнай гаспадарцы да $760 у эквіваленце. Першы віцэ-прэм'ер удакладніў, што ў бюджэтнай сферы да канца 2010 года сярэдняя заработная плата павінна дасягнуць $700 у эквіваленце. У 2009 годзе памер сярэдняй заработнай платы ў цэлым па народнай гаспадарцы павінен скласці $590, а ў бюджэтнай сферы - $550, удакладніў Уладзімір Сямашка.

Паводле слоў першага віцэ-прэм'ера, прагназуемы рост ВУП у 2009 годзе дасць магчымасць забяспечыць прырост рэальных даходаў насельніцтва на ўзроўні 14-15 працэнтаў.

Тэмп росту платных паслуг насельніцтву ў 2009 годзе прагназуецца на ўзроўні 113-114 працэнтаў, рознічнага тавараабароту - 116-117 працэнтаў.-

Урад Беларусі абмяркоўвае магчымасць росту зарплаты да ўзроўню $1 тыс., заявіў Першы намеснік Прэм'ер-міністра Беларусі Уладзімір Сямашка, адказваючы на пытанні парламентарыяў. Ён сказаў, што такую задачу паставіў перад Урадам Прэзідэнт Беларусі. Уладзімір Сямашка адзначыў, што цяпер урад вырашае задачу да канца 2010 года давесці ўзровень заработнай платы ў сярэднім да не менш як $760 па краіне. "У прамысловасці гэты паказчык будзе яшчэ вышэйшы, - удакладніў першы віцэ-прэм'ер. - Для таго, каб выйсці на гэты рубеж, мы павінны павысіць тэмпы росту ВУП да 110,5-112 працэнтаў. Гэта не самамэта, гэта сродак для дасягнення такой задачы".

Уладзімір Сямашка адзначыў, што "мы рухаемся да таго, каб сярэднямесячная заработная плата расла і, як у савецкі час, была роўная кошту 1 кв.м жылой плошчы". Першы віцэ-прэм'ер нагадаў, што ў 2008 годзе ў Беларусі павінна быць пабудавана 4,7-5,2 млн.кв.м жылля, а ў 2010 годзе - 10 млн.кв.м. "Мы будзем падціскаць будаўнікоў, каб яны зніжалі кошт будаўніцтва жылля, каб на сваю заработную плату грамадзянін мог пабудаваць кватэру, узяць для гэтага крэдыт", - адзначыў Уладзімір Сямашка.

На думку Уладзіміра Сямашкі, зніжэнне падатковай нагрузкі ў 2009 годзе на 1,2 працэнтнага пункта да ВУП вызваліць для развіцця эканомікі Br1,4 трлн. Гэтыя грошы застануцца ў рэальным сектары эканомікі. У мэтах скарачэння падатковай нагрузкі ў 2009 годзе прадугледжваецца зніжэнне стаўкі збору ў рэспубліканскі фонд падтрымкі сельгасвытворцаў з 2 працэнтаў да 1 працэнта ад выручкі. Гэта дасць скарачэнне даходаў на Br1,245 трлн. Будуць устаноўлены таксама адзіныя стаўкі мясцовых падаткаў з продажаў тавараў у рознічным гандлі і мясцовага падатку на паслугі ў памеры 5 працэнтаў. Цяпер пакуль што дзейнічаюць стаўкі 5 працэнтаў і 15 працэнтаў на айчынныя і імпартныя тавары адпаведна. Ад скарачэння гэтых падаткаў у эканоміку паступіць Br305,2 млрд. Будуць выключаны з аб'ектаў падаткаабкладання падатак на нерухомую маёмасць, актыўную частку вытворчых фондаў (Br312,7 млрд.). Удасканальваецца парадак і ўмовы прымянення падаходнага падатку з фізічных асоб і яго спрашчэнне. У 2009 годзе намечаны пераход да прымянення адзінай стаўкі падаткаабкладання - 12 працэнтаў.

Рэалізацыя гэтых мер і дасць магчымасць скараціць падатковую нагрузку ў 2009 годзе.

Акрамя таго, канцэрн "Белнафтахім" за 5 месяцаў гэтага года забяспечыў стабільную работу арганізацый, якія ў яго ўваходзяць. Тэмп росту выпуску прадукцыі ў паліўнай прамысловасці за гэты перыяд павялічаны на 13,9 працэнта, у нафтаперапрацоўчай - на 19,4 працэнта.

"На буйных прадпрыемствах "Белнафтахіма" ідзе інтэнсіўны працэс мадэрнізацыі вытворчых магутнасцей. Надзвычай складана ў час мадэрнізацыі забяспечваць тэмп росту прамысловай вытворчасці, але тым не менш, у нас гэта атрымліваецца", - сказаў Першы намеснік Прэм'ер-міністра Беларусі Уладзімір Сямашка.

Паводле слоў Уладзіміра Сямашкі, нафтаперапрацоўчыя заводы поўнасцю забяспечаны сыравінай, узрос экспартны патэнцыял нафтахімічнага комплексу.

У цэлым прагноз сацыяльна-эканамічнага развіцця краіны выконваецца па большасці зацверджаных параметраў. Асноўнай крыніцай высокага тэмпу эканамічнага росту з'яўляецца прамысловасць. За 5 месяцаў 2008 года рост прампрадукцыі склаў 113,3 працэнта пры прагнозе 108-109 працэнтаў.

У машынабудаванні і металаапрацоўцы аб'ём вытворчасці прамысловасці за 5 месяцаў узрос на 14,9 працэнта. Гэта дало магчымасць павялічыць вытворчасць трактароў на 21,8 працэнта, збожжаўборачных камбайнаў - на 48,8 працэнта.

Тэмп росту вытворчасці спажывецкіх тавараў у Беларусі ўжо не адпавядае пастаўленым высокім задачам сацыяльна-эканамічнага развіцця. Па выніках 5 месяцаў гэтага года выпуск спажывецкіх тавараў у Беларусі ўзрос на 14,2 працэнта ў параўнанні з аналагічным перыядам мінулага года (прагноз росту на год - на 9-10 працэнтаў). Аднак гэта недастатковы ўзровень. "Павышэнне заработнай платы да канца пяцігодкі да $700, а магчыма і вышэй, дыктуе неабходнасць звязвання грошай і патрабуе павелічэння вытворчасці высакаякасных айчынных тавараў і паслуг", - сказаў Уладзімір Сямашка. Інакш можна атрымаць некантралюемы аб'ём спажывецкага імпарту, удакладніў ён.

У сувязі з гэтым урад адкарэкціраваў парадак арганізацыі і фарміравання імпартазамяшчальных праграм. Узмоцнены кантроль за рэалізацыяй інавацыйных праектаў у сферы імпартазамяшчэння.

Уладзімір Сямашка адзначыў, што ёсць праблемы з канцэрнам "Беллегпрам", які не выйшаў на ўзровень вытворчасці прадукцыі мінулага года. Разам з тым ужо намеціўся рух па росту вытворчасці, і ў другім паўгоддзі чакаюцца станоўчыя вынікі ў рабоце канцэрна, сказаў першы віцэ-прэм'ер. Ён нагадаў, што ў маі прыняты ўказ нумар 282, які дасць магчымасць прадпрыемствам канцэрна нарасціць абаротныя сродкі і выйсці на больш эфектыўную работу.

Тры заводы - спадарожнікі МТЗ будуць створаны ў бягучым годзе, заявіў сёння, выступаючы ў парламенце, Першы віцэ-прэм'ер Беларусі Уладзімір Сямашка. У прыватнасці, у лістападзе запланаваны ўвод у эксплуатацыю вытворчасці трактароў у Бабруйску. Магутнасці гэтага завода ацэньваюцца ў 6-7 тыс. трактароў у год. Вытворчасць на 4-5 тыс. гусенічных трактароў у год таксама будзе адкрыта ў Мазыры. Акрамя таго, у Смаргоні арганізуецца вытворчасць трактароў для апрацоўкі садоў. Іх плануецца выпускаць у колькасці 4-5 тыс. у год.

Усяго да канца бягучага года ў Беларусі плануецца рэалізаваць яшчэ 252 праекты ў рамках Дзяржаўнай праграмы інавацыйнага развіцця на 2007-2010 гады. На гэты час рэалізаваны 721 праект, у ліку якіх увод у эксплуатацыю завода газетнай паперы ў Шклове.

Сістэму электронных білетаў на ўсе віды міжгародняга транспарту ўвядуць у Беларусі. Аб гэтым паведаміў сёння першы намеснік прэм'ер-міністра Беларусі Уладзімір Сямашка на сумесным пасяджэнні дзвюх палат Нацыянальнага сходу.
Паводле яго слоў, укараненне такой сістэмы плануецца ў 2009 годзе, таму што існуючая сёння сістэма выдачы білетаў стваралася 30 гадоў таму і патрабуе абнаўлення.

Першы віцэ-прэм'ер сказаў, што свае паслугі па ўкараненню электроннай сістэмы выдачы білетаў прапануе ўжо адна фірма з ААЭ.

Многія карпарацыі з сусветным імем гатовы інвесціраваць у Беларусь, заявіў Уладзімір Сямашка. Паводле яго слоў, праведзенае ў маі ў Мінску пасяджэнне Кансультатыўнага савета па замежных інвестыцыях пры Савеце Міністраў паказала, што расце цікавасць замежных інвестараў да работы ў Беларусі. "Многія карпарацыі з сусветным імем гатовы прыйсці ў Беларусь надоўга і ўкласці значныя грошы", - падкрэсліў Уладзімір Сямашка.

Ён лічыць, што павышэнню такой цікавасці таксама будзе садзейнічаць прыняцце рашэнняў па ўдасканаленню фінансавага рынку. "Мы ўшчыльную падышлі да магчымасці выхаду на міжнародныя фінансавыя рынкі, грунтоўна рыхтуемся да працэдуры IPO з долямі акцый вядучых прадпрыемстваў краіны", - паведаміў Першы віцэ-прэм'ер.

ВЫДАННІ САВЕТА МІНІСТРАЎ РЭСПУБЛІКІ БЕЛАРУСЬ

ІНТЭРНЭТ-РЭСУРСЫ