НавIны

Іран выступае за пашырэнне супрацоўніцтва з Беларуссю

1 2 3 4 5

Іран выступае за пашырэнне супрацоўніцтва з Беларуссю. Аб гэтым заявіў 29 студзеня Кіраўнік Адміністрацыі Прэзідэнта Ісламскай Рэспублікі Іран Эсфандзіяр Рахім Машаі на сустрэчы з Першым намеснікам Прэм'ер-міністра Беларусі Уладзімірам Сямашкам.

Кіраўнік Адміністрацыі Прэзідэнта Ірана выказаў задавальненне рэалізацыяй беларуска-іранскіх праектаў. "Нас радуе супрацоўніцтва ў галіне энергетыкі, аднак у нас няма абмежаванняў для супрацоўніцтва ва ўсіх астатніх сферах, партнёрства паміж краінамі можна і далей пашыраць", - сказаў ён. Пры гэтым Эсфандзіяр Рахім Машаі адзначыў, што Іран і Беларусь маюць вялікі патэнцыял для развіцця эканомік. Збліжэнне Беларусі і Ірана прынясе карысць абодвум краінам.

У той жа час дружба паміж дзяржавамі і народамі патрабуе правядзення значнай сумеснай работы ў эканамічнай сферы. "Іран мае вялікую праграму развіцця эканомікі, у тым ліку на міжнароднай арэне, і Беларусь для нас вельмі добры партнёр, - падкрэсліў Эсфандзіяр Рахім Машаі. - Я рады, што мы пачалі ўжо выконваць сумесныя праекты, спадзяюся, што з кожным днём яны будуць дынамічна развівацца".

У сваю чаргу, Першы намеснік Прэм'ер-міністра Беларусі Уладзімір Сямашка выказаў удзячнасць Адміністрацыі Прэзідэнта і Ураду Ірана за стварэнне неабходных умоў для рэалізацыі сумеснага праекта па здабычы нафты на іранскім радовішчы Джафеір. "Лічу, літаральна праз 1,5-2 гады праект будзе даваць аддачу, будзе здабывацца нафта і рэалізоўвацца на міжнародных рынках на карысць Беларусі і Ірана", - сказаў Уладзімір Сямашка. Пры гэтым ён адзначыў, што пытанне "выхаду для здабычы нафты ў іншыя краіны надзвычай важнае для рэспублікі".

Уладзімір Сямашка адзначыў дынаміку ў гандлёва-эканамічным супрацоўніцтве паміж краінамі апошнім часам. І гэта нягледзячы на тое, што ў 2009 годзе "была невялікая затрымка па зразумелых прычынах, не залежных ад краін". "Ідзе назапашванне патэнцыялу для прарыву ў гандлёва-эканамічным супрацоўніцтве паміж нашымі краінамі, - упэўнены першы віцэ-прэм'ер Беларусі. - Тыя праекты, якія мы рэалізуем, павінны прынесці вынікі, важныя як для адной, так і для другой краіны".

Для прапрацоўкі сумесных праектаў створаны неабходныя механізмы, якія прымяняе сумесная беларуска-іранская камісія па гандлёва-эканамічнаму супрацоўніцтву. Апошняе пасяджэнне камісіі адбылося ў снежні мінулага года. Тады былі прыняты канкрэтныя рашэнні, дасягнуты канкрэтныя дамоўленасці, падпісаныя дакументы аб пастаўках у Іран кар'ерных самазвалаў БелАЗ і аднаўленні зборкі грузавых аўтамабіляў МАЗ, нагадаў першы віцэ-прэм'ер.

Ён адзначыў, што Беларусь гатова не толькі пастаўляць у Іран гатовыя вырабы, але і прапанаваць больш шырокую форму супрацоўніцтва, якая дасць магчымасць задзейнічаць прамысловы патэнцыял дзвюх краін. У ліку такіх праектаў - арганізацыя зборачных вытворчасцей, калі з максімальнай лакалізацыяй будуць збірацца розныя віды грузавых аўтамабіляў.

Паводле слоў Уладзіміра Сямашкі, Урад Беларусі імкнецца стварыць максімальна камфортныя ўмовы для развіцця іранскага бізнесу, каб ствараліся сумесныя прадпрыемствы і паспяхова функцыянавалі іранскія прадпрыемствы ў Беларусі. Некаторыя праекты іранскіх кампаній ужо рэалізуюцца ў Беларусі, у тым ліку кампаній "Азараб", "Кейсан". Асаблівая ўвага надаецца праекту па зборцы аўтамабіляў "Саманд". "Па гэтаму праекту былі некаторыя праблемы, але мы чакаем, што ён пачне набіраць абароты, - сказаў першы віцэ-прэм'ер. - Мы можам многія праблемы вырашыць такім чынам, каб гэта было выгадна і Беларусі, і Ірану".

Дыпламатычныя адносіны паміж Беларуссю і Іранам усталяваны ў сакавіку 1993 года. У рамках развіцця дагаворна-прававой базы двухбаковага супрацоўніцтва бакамі падпісана 35 міждзяржаўных і міжведамасных дагавораў, у тым ліку пакет базавых эканамічных пагадненняў. Перспектыўным напрамкам інвестыцыйнага супрацоўніцтва дзвюх краін з'яўляецца ўдзел іранскіх кампаній у рэалізацыі праектаў у Беларусі ў галіне капітальнага будаўніцтва і мадэрнізацыі інфраструктуры. На 1 студзеня 2009 года ў Беларусі зарэгістравана 6 сумесных беларуска-іранскіх і 18 прадпрыемстваў са стопрацэнтным іранскім капіталам. У студзені-лістападзе 2009 года тавараабарот паміж краінамі дасягнуў $65,2 млн., экспарт у Іран склаў $57,1 млн. Асноўныя крыніцы экспарту - сінтэтычныя валокны, металапрадукцыя, грузавыя аўтамабілі, трактары, калійныя ўгнаенні.

ВЫДАННІ САВЕТА МІНІСТРАЎ РЭСПУБЛІКІ БЕЛАРУСЬ

ІНТЭРНЭТ-РЭСУРСЫ