| |
ПРАГРАМА МЕР ПА ЗМЯКЧЭННЮ ВЫНІКАЎ ЗМЯНЕННЯ КЛІМАТУ НА 2008-2012 ГАДЫ ПРЫНЯТА Ў БЕЛАРУСІ
Нацыянальная праграма мер па змякчэнню вынікаў змянення клімату на 2008-2012 гады прынята ў Беларусі. Такое рашэнне змяшчаецца ў Пастанове Савета Міністраў нумар 1117 ад 4 жніўня.
Праграма распрацавана ў адпаведнасці з Нацыянальным планам дзеянняў па рацыянальнаму выкарыстанню прыродных рэсурсаў і ахове навакольнага асяроддзя Рэспублікі Беларусь на 2006-2010 гады. Дакумент прадугледжвае ўдасканаленне нарматыўна-прававой базы, сістэмы інфармацыйнага забеспячэння і падрыхтоўкі кадраў, развіццё навуковых ведаў па гэтай праблеме, выкананне абавязацельстваў па міжнародных кліматычных пагадненнях, міжнароднае супрацоўніцтва ў сферы аховы навакольнага асяроддзя, скарачэнне выкідаў з крыніц і павелічэнне абсорбцыі парніковых газаў паглынальнікамі.
Акрамя таго, важны складальнік праграмы - распрацоўка папераджальных мер па прадухіленню сур'ёзнага ўрону, які можа быць нанесены залежным ад змянення клімату галінам эканомікі Беларусі. Так, плануецца прыцягненне нацыянальных і замежных інвестыцый да праектаў у галіне аховы навакольнага асяроддзя, перш за ўсё да ўкаранення кліматычна дружалюбных тэхналогій (з нізкім выкідам або адсутнасцю выкідаў парніковых газаў) і павелічэння выкарыстання экалагічна прыярытэтных аднаўляльных крыніц энергіі.
Таксама ў Нацыянальнай праграме ўдзелена ўвага ўдасканаленню спосабаў назірання за змяненнямі клімату, павышэнню дакладнасці кліматычных і гідраметэаралагічных даных. Будуць асвоены новыя тэхналогіі назіранняў, мадэрнізавана дзяржаўная сетка гідраметэаралагічных назіранняў. Дарэчы, у рэспубліцы гідраметэаралагічныя назіранні цяпер праводзяць 52 станцыі, 8 авіяметэаралагічных станцый, 2 аэралагічныя станцыі, 3 радыёметэаралагічныя лакатары, 137 гідралагічных пастоў. Існуючая шчыльнасць пунктаў гідраметэаралагічных назіранняў адпавядае патрабаванням Сусветнай метэаралагічнай арганізацыі.
На думку распрацоўшчыкаў дакумента, рэалізацыя праграмы дасць магчымасць палепшыць экалагічную абстаноўку ў гарадах і рэгіёнах рэспублікі, атрымаць максімальны эканамічны эфект ад паляпшэння выкарыстання прыродных рэсурсаў, стварыць надзейную сістэму захоўвання даных аб клімаце і прагнозах змянення клімату і забяспечыць доступ спажыўцоў да такой інфармацыі.
Такім чынам, чакаецца, што ва ўмовах планамернага росту ВУП выкіды парніковых газаў за 5 гадоў (2008-2012 гады) скароцяцца не менш як на 12 млн.т у эквіваленце СО2. Выкіды такіх традыцыйных забруджвальных рэчываў, як монааксід вугляроду, зменшацца не менш як на 0,6 тыс.т, аксіды азоту - на 1,2 тыс.т, аміяку - на 0,6 тыс.т, рэчывы, якія змяшчаюць серу, - не менш як на 1,6 тыс.т.
| |
© 2005-2008 Апарат Савета Міністраў Рэспублікі Беларусь
Пры выкарыстанні інфармацыі спасылка на друкаваную крыніцу з`яўляецца абавязковай
Інфармацыйная падтрымка УП "Беларускае тэлеграфнае агенцтва"
|
|
|
Устойлівасць беларускай эканомікі - у стварэнні экспартаарыентаваных вытворчасцей. Такую думку выказаў Прэм'ер-міністр Беларусі Сяргей Сідорскі на ўрачыстай цырымоніі пуску ў эксплуатацыю другой тэхналагічнай лініі па вытворчасці мінералаватных вырабаў на аснове базальтавага валакна ў ААТ "Гомельбудматэрыялы". Чым больш у рэспубліцы будзе такіх вытворчасцей, тым хутчэй і прасцей будзе пераадольваць уплыў негатыўных з'яў на сусветным рынку. Увод у эксплуатацыю новай лініі дасць магчымасць у поўным аб'ёме забяспечыць будаўнічую галіну рэспублікі сучаснымі цеплаізаляцыйнымі плітамі, а таксама пастаўляць частку прадукцыі на экспарт.
Урад Беларусі павялічыў квоты на вытворчасць у 2008 годзе тытунёвых вырабаў з 19 млрд. штук да 19,5 млрд. штук. Такое рашэнне змяшчаецца ў Пастанове Савета Міністраў ад 18 лістапада нумар 1736.
Беларусь акажа Кубе гуманітарную дапамогу ў сувязі са стыхійным бедствам, якое спасцігла гэту краіну. Міністэрству фінансаў пастановай Савета Міністраў прадпісана выдзеліць у 2008 годзе Міністэрству замежных спраў для пасольства Беларусі ў Кубе з рэспубліканскага бюджэту за кошт сродкаў фонду фінансавання расходаў, звязаных са стыхійнымі бедствамі, аварыямі і катастрофамі, 30 тыс. еўра на аказанне гуманітарнай дапамогі Кубе.
У план прыватызацыі аб'ектаў, якія знаходзяцца ў рэспубліканскай уласнасці, на 2008-2010 гады ўнесены змяненні. Такое рашэнне прынята Пастановай Савета Міністраў нумар 1709.
Кантроль за працоўнай дзейнасцю нядбайных бацькоў у бліжэйшы час будзе ўзмоцнены. Аб гэтым Намеснік Прэм'ер-міністра Беларусі Аляксандр Косінец заявіў сёння ў Мінску ў час сустрэчы з бацькамі, чые дзеці знаходзяцца на дзяржаўным выхаванні.
Беларускі інвестыцыйны форум пачаўся ў
канферэнц-цэнтры Чэрч Хаўз у Лондане. Яго работу ўзначальвае Прэм'ер-міністр Беларусі Сяргей Сідорскі.
У Беларусі пераносяцца рабочыя дні ў снежні бягучага года і ў студзені 2009 года. Такое рашэнне прадугледжана пастановай Савета Міністраў нумар 1720 ад 15 лістапада 2008 года.
У 2008 годзе ў сельскай гаспадарцы будуць выкананы ўсе прагнозныя паказчыкі, акрамя вытворчасці малака. Аб гэтым заявіў сёння першы віцэ-прэм'ер Уладзімір Сямашка на пасяджэнні Прэзідыума Савета Міністраў, дзе абмяркоўваўся ход выканання Дзяржаўнай праграмы адраджэння і развіцця вёскі на 2005-2010 гады па выніках работы за 9 месяцаў, а таксама меры па ліквідацыі дапушчанага адставання пры рэалізацыі мерапрыемстваў гэтай праграмы.
Беларусь разглядае магчымасць прыцягнення замежных кампаній у сферу страхавання жыцця. Аб гэтым паведаміў сёння ў Лондане журналістам віцэ-прэм'ер Беларусі Андрэй Кабякоў. Ён адзначыў, што размова ідзе аб страхавых кампаніях - рэзідэнтах Беларусі. "Гэта прынцыповая пазіцыя", - падкрэсліў ён.