Прэм'ер, віцэ-прэм'еры і кіраўніцтва Апарату Савета Міністраў сёння працуюць на добраўпарадкаванні брацкай магілы каля вёскі Пяцеўшчына Мінскага раёна ў рамках рэспубліканскага суботніка. Удзельнікі мерапрыемства высаджваюць туі, укладваюць плітку і афарбоўваюць мемарыял.
Аляксандр Турчын падкрэсліў, што савецкая традыцыя правядзення суботнікаў стала ўжо традыцыяй суверэннай Беларусі. "На самай справе выдатная традыцыя - наводзіць вясной парадак, рабіць важныя справы, - адзначыў ён. - Сёння мы працуем на месцы, дзе загінулі нашы людзі ў час Вялікай Айчыннай вайны, абараняючы нашу незалежнасць".
Паводле слоў Прэм'ера, важна не забываць тое, што тады чынілася на тэрыторыі нашай краіны. "Таму што 85 гадоў для чалавека - гэта вельмі шмат, а для гісторыі - гэта наогул імгненне. І нельга выключаць таго, што зверствы, якія чыніліся на тэрыторыі нашай краіны, могуць паўтарыцца. Таму трэба пра гэта памятаць, каб, памятаючы мінулае, атрымліваць урокі для будучыні", - падкрэсліў ён.
На пытанне аб тым, ці складана Апарату Савета Міністраў даводзіцца на суботніку, Аляксандр Турчын заўважыў: "Мы прывыклі да такой работы. Яна ідзе дастаткова зладжана. Цяжкавата, пот з ілба выціраем".
Прэм'ер звярнуў увагу, што гэта яшчэ раз даказвае, што чыноўнікі Беларусі - гэта людзі, якія не адарваны ад зямлі.
Прэм'ер, віцэ-прэм'еры і кіраўніцтва Апарату Савета Міністраў сёння працуюць на добраўпарадкаванні брацкай магілы, у якой пахавана 45 воінаў Чырвонай арміі і партызан, якія загінулі ў баях у чэрвені 1941 года, пры абароне вёскі Пяцеўшчына і ў чэрвені 1944 года пры яе вызваленні.
Грашовыя сродкі, заробленыя ад правядзення вясенняга суботніка, будуць накіраваны на стварэнне пастаяннай экспазіцыі Нацыянальнага гістарычнага музея Беларусі, які будуецца, і іншыя звязаныя з гэтым работы.
