Дэлегацыя В'етнама на чале з Генеральным сакратаром Цэнтральнага камітэта Камуністычнай партыі В'етнама То Ламам сумесна з Прэм'ер-міністрам Беларусі Аляксандрам Турчыным наведала Мінскі трактарны завод. Гасцям прэзентавалі шырокі мадэльны рад трактарнай тэхнікі і не толькі.
Госці наведалі выстаўку беларускай тэхнікі, дзе прадстаўлены трактары BELARUS, узоры тэхнікі Мінскага аўтазавода, "МотаВелаЗавода", "Бабруйскаграмаша" і "Лідаграпраммаша".
Прэм'ер-міністр звярнуў увагу на легендарны трактар BELARUS 1222.3, які ўдастоены Дзяржаўнага знака якасці, падкрэсліўшы, што зборка такога трактара можа стаць знакавым праектам для дзвюх краін.
То Лам падкрэсліў, што гэта сапраўды можа стаць запатрабаваным напрамкам развіцця двухбаковага супрацоўніцтва. "Дзяржаўныя прадпрыемствы і прыватныя кампаніі могуць выкарыстоўваць вашы трактары для сваіх патрэб. Акрамя таго, тэхніку можна экспартаваць", - сказаў генеральны сакратар.
Аляксандр Турчын адзначыў, што перспектыўным напрамкам развіцця супрацоўніцтва з В'етнамам могуць стаць пажарныя машыны, і прапанаваў азнаёміцца з адной з такіх вытворчасцей у Беларусі. То Лам прапанову прыняў, адзначыўшы, што ў Беларусі вельмі развіта машынабудаванне і грузападымальнасць машын уражвае.
Ён звярнуў увагу, што В'етнам таксама зацікаўлены ў вытворчасці спецыялізаваных аўтобусаў для перавозкі школьнікаў, што можа стаць яшчэ адной сферай супрацоўніцтва дзвюх краін. "Жаданне купляць аўтобусы ў нас вельмі вялікае. Гэтыя аўтобусы павінны быць больш якаснымі і трывалымі", - сказаў То Лам.
Фота: БЕЛТА
