Урад устанавіў заданні для рэгіёнаў па ўводзе жылля на 2026 год. Адпаведную пастанову падпісаў Прэм'ер-міністр Беларусі Аляксандр Турчын.
Пастановай прадугледжваецца давядзенне паказчыка па ўводзе ў 2026 годзе ў эксплуатацыю агульнай плошчы жылых дамоў (4 млн кв.м), а таксама яго паквартальнай разбіўкі, уключаючы жыллё, якое будуецца ў рамках дзяржаўнага заказу, з выкарыстаннем дзяржаўнай падтрымкі, арэнднае жыллё.
Квартальныя заданні па ўводзе ў эксплуатацыю агульнай плошчы жылых дамоў устаноўлены ў наступнай прапорцыі: у першым квартале 2026 года - не менш як 15 працэнтаў, у першым паўгоддзі 2026-га - не менш як 35 працэнтаў, за 9 месяцаў 2026 года - 65 працэнтаў ад гадавога плана.
Таксама пастановай дапоўнены пералік аб'ектаў-даўгабудаў для прыёмкі ў эксплуатацыю па фактычным стане (зацверджаны пастановай Савета Міністраў ад 24 снежня 2025 года нумар 766) пяццю аб'ектамі ў Гомелі і Гродне з высокай ступенню будаўнічай гатоўнасці з мэтай уключэння іх у гаспадарчы абарот і навядзення парадку на зямлі.