Беларусь плануе нарошчваць экспарт сельгаспрадукцыі ў афрыканскі і азіяцкі рэгіёны. Аб гэтым заявіў Намеснік Прэм'ер-міністра Беларусі Юрый Шулейка на палях міжнароднай спецыялізаванай аптовай выстаўкі-кірмашу PRODEXPO-2025 у Мінску.
На яго думку, арыенцірам для экспарту застаецца Расія, аднак трэба ісці ў афрыканскі і азіяцкі рэгіёны. "Туды, дзе нашу прадукцыю яшчэ не ведаюць, але яна мае месца быць. Для краіны важна пастаўляць 60-70 працэнтаў сваёй прадукцыі на экспарт", - падкрэсліў віцэ-прэм'ер.
Юрый Шулейка адзначыў, што, праводзячы кожны год такую выстаўку, ставіцца мэта максімальна паказаць рэсурс краіны і запрасіць партнёраў, калег з іншых краін, якія таксама хочуць прадэманстраваць свае поспехі ў галіне. "Усё, што робіцца ў нашай краіне, сведчыць аб экспартным патэнцыяле. У бягучым годзе чакаем рэкордныя $9 млрд экспарту прадуктаў харчавання", - звярнуў увагу ён.
PRODEXPO - вядучая галіновая харчовая выстаўка Беларусі. Яе арганізатарамі выступаюць Нацыянальны выставачны цэнтр "БелЭкспа" Кіраўніцтва справамі Прэзідэнта Рэспублікі Беларусь і Міністэрства сельскай гаспадаркі і харчавання Рэспублікі Беларусь пры падтрымцы канцэрна "Белдзяржхарчпрам".
Выстаўка збірае вытворцаў і пастаўшчыкоў прадуктаў харчавання і напіткаў. Для аператараў харчовай індустрыі PRODEXPO стала добрай дэманстрацыйнай пляцоўкай: тут праходзяць прэм'еры прадуктовых і гастранамічных навінак, прэзентацыі тэхналогій і рашэнняў для вытворчасці прадукцыі - ад прадуктаў штодзённага рацыёну да далікатэсаў, святочных закусак і прадуктаў спецыяльнага харчавання.