Віцебская вобласць на працягу некалькіх гадоў зменіцца як візуальна, гэтак і ў эканамічным плане. Аб гэтым заявіў журналістам Прэм'ер-міністр Беларусі Аляксандр Турчын па выніках нарады Кіраўніка дзяржавы з кіраўніцтвам Саўміна.
Адным з пытанняў нарады быў праект распараджэння аб далучэнні да агракамбіната "Дзяржынскі" Аршанскага мясакансервавага камбіната з яго сыравіннай зонай. Такім чынам знойдзены рэзервы аздараўлення і росту эфектыўнасці аршанскага прадпрыемства, і трэба было абмеркаваць шэраг пытанняў фінансавага характару.
"Фактычна гэта дакумент у развіццё нарады ў Прэзідэнта па Віцебскай вобласці. Гэта адзін з дакументаў, які накіраваны на рэалізацыю даручэнняў Прэзідэнта. Маштабы гэтага праекта пашырыліся літаральна на нарадзе ў Прэзідэнта, - расказаў Аляксандр Турчын. - Я лічу, што вынікі ў Віцебскай вобласці ўжо ёсць. І калі мы рэалізуем усе намечаныя планы, я думаю, на працягу некалькіх гадоў Віцебская вобласць зменіцца. Зменіцца як візуальна, так і, самае галоўнае, у эканамічным плане. У мяне асабіста сумненняў у гэтым няма".
Што датычыцца перадачы дадатковых актываў агракамбінату "Дзяржынскі", Прэм'ер-міністр адзначыў: "Эфект маштабу ніхто не адмяняў. Маштабаванне бізнесу - гэта нармальны эвалюцыйны працэс. У гэтым ёсць эканамічная логіка".
Аляксандр Турчын таксама падкрэсліў, што Беларусь - кампактная дзяржава, і тут не павінна быць ніякай зайздрасці паміж рэгіёнамі. Як, напрыклад, у гэтым выпадку, калі прадпрыемства, якое базіруецца ў Мінскай вобласці, атрымлівае актыў у Віцебскай.
"Мы працуем у адной краіне. Не па-гаспадарску, калі сучаснае прадпрыемства загружана напалову. Для чаго мы ўкладвалі грошы? Каб яно працавала на 50 працэнтаў магутнасці? Адпаведна, няма генерацыі выручкі, прыбытку, не можам абслугоўваць свае абавязацельствы і цэлы шэраг наступстваў, якія вынікаюць адсюль. Таму гэта правільнае рашэнне", - сказаў Аляксандр Турчын.
Прэм'ер-міністр прывёў прыклад, што працаваць без пасрэдніка з буйнымі расійскімі федэральнымі гандлёвымі сеткамі могуць толькі буйныя вытворцы. А дробныя вымушаны звяртацца па дапамогу да трэйдара.
Што датычыцца ў цэлым пытанняў аказання дзяржпадтрымкі ў той ці іншай форме, Аляксандр Турчын адзначыў, што гэта магчыма, але толькі калі на прадпрыемстве да гэтага зрабілі ўсё, што ў іх сілах. У тым ліку аптымізавалі затраты, папрацавалі над сабекоштам выпускаемай прадукцыі. "Тады гэта справядліва. Тое, што заўсёды патрабуе Прэзідэнт", - сказаў Прэм'ер-міністр.
Як расказаў журналістам генеральны дырэктар ААТ "Агракамбінат "Дзяржынскі" Уладзімір Лук'янаў, асноўны від дзейнасці Аршанскага мясакансервавага камбіната ў выпадку далучэння да агракамбіната не зменіцца. Размова ідзе аб вытворчасці кансервавых вырабаў, якія і далей будуць выпускаць на камбінаце. Разам з тым на прадпрыемстве плануецца мадэрнізацыя, якая дасць магчымасць павялічыць аб'ём прадукцыі. Разглядаецца таксама пытанне вытворчасці кармоў для жывёл на камбінаце.
Пры гэтым ад брэнда Аршанскага мясакансервавага камбіната адыходзіць не плануюць. "Сам брэнд АМКК мы захоўваем. У іх ёсць свой спажывец, таму і на іх брэнд ёсць запыт", - падкрэсліў Уладзімір Лук'янаў.
