Прэм'ер-міністр Аляксандр Турчын уручыў дзяржаўныя ўзнагароды прадстаўнікам розных сфер.
"Мы адзначаем заслугі тых, хто сваёй працай і талентам штодзённа робіць нашу краіну лепшай. Кожны з вас не проста выконвае сваю работу, а робіць яе так, што гэта становіцца прыкладам, дастойным пераймання і гордасці", - падкрэсліў Аляксандр Турчын. Дзяржаўная ўзнагарода - гэта прызнанне канкрэтных вынікаў, знак павагі вопыту і прафесіяналізму. "Гэта і ўдзячнасць вам за вытрымку, вернасць справе, самаадданую і сумленную працу, ад якой залежыць будучыня Рэспублікі Беларусь", - звярнуўся ён да прысутных.
Сярод іх, дарэчы, людзі самых розных прафесій - энергетыкі, прадстаўнікі прамысловага комплексу, сельскай і лясной гаспадаркі, дзяржаўныя служачыя. "Ваша праца - гэта трывалы фундамент, на якім трымаецца краіна. Вы - лепшыя з лепшых. Вы не проста спраўляецеся з пастаўленымі задачамі, вы задаяце планку. Ваш прафесіяналізм - гэта рухаючая сіла нашай дзяржавы", - дадаў прэм'ер.Быць сапраўдным прафесіяналам, працаваць сумленна - гэта не фармальнасць, а штодзённы выбар, які ўзнагароджаныя сёння робяць з гонарам і годнасцю. "Гэтым вы заслугоўваеце павагі ўсёй краіны. Сведчаннем таго сёння з'яўляецца ваша высокая дзяржаўная ўзнагарода", - звярнуў увагу кіраўнік Урада.
Журналістам начальнік аддзела кантролю ветэрынарна-санітарнай якасці прадукцыі жывёльнага паходжання Гродзенскай абласной ветэрынарнай лабараторыі Таісія Вянсковіч прызналася, што эмоцыі ў такі дзень зашкальваюць. "Калі даведалася аб узнагародзе, вядома, не паверыла. Я, напэўна, разы два ці тры прачытала паведамленне ў чаце ад начальніка, - расказала яна. - Калегі ўсе віншавалі, таму што ў лабараторыі - гэта першая ўзнагарода. Усе чакаюць, што я прыеду з медалём".
Гаворачы аб прафесійнай дзейнасці, настаўнік інфарматыкі гімназіі нумар 1 імя абаронцаў Брэсцкай крэпасці Брэста Ірына Гарбацэвіч, якая ўзнагароджана медалём Францыска Скарыны, расказала, што дзеці заўсёды былі розныя, а цяпер да іх трэба навучыцца прыслухоўвацца. "Дзеці трыццаць гадоў таму былі паслухмяныя і для іх асноўнай крыніцай інфармацыі быў настаўнік, а цяпер крыніцы зусім іншыя. Настаўнікі цяпер больш каардынатары. Гэта ўжо сябар, выхавальнік, памочнік, - адзначыла яна. - Такой высокай узнагароды я, вядома, не чакала. Галоўнае ўсё ж гэта не ўзнагарода, а дасягненні дзяцей. Важна ўкласці ў дзяцей столькі, каб яны выйшлі на свой максімум. Я ў сваёй прафесіі таксама выйшла на максімум".
Першы намеснік дырэктара - галоўны інжынер філіяла "Лідскія энергетычныя сеткі" РУП "Гроднаэнерга" Віктар Сарока аб сваёй рабоце гаворыць так: вельмі цікавая і шматпланавая. "Ніколі не даводзіцца сядзець у кабінетах. Увесь час працуеш на аб'ектах, на тэрыторыях, размаўляеш з людзьмі, таму што мы служым для іх - нясём святло, цяпло ў кожны дом. Таму гэта ўзнагарода - гэта вялікі гонар", - звярнуў ён увагу.
Першы намеснік генеральнага дырэктара РУП "Белтэлекам" Генадзь Мельнікаў, які ўзнагароджаны медалём "За працоўныя заслугі", адзначыў, што для яго гэта высокі гонар. "Мая работа звязана з галіной электрасувязі і наша галіна за апошні час зведала вялікія змяненні, мадэрнізацыю. Ад аналагавых сетак і сістэм сёння мы ўвайшлі ў сістэму лічбавай эканомікі, сур'ёзных лічбавых змяненняў. Я ўспрымаю сваю ўзнагароду не толькі як асабістае, але і як уклад усяго калектыву "Белтэлекама" ў гэты вынік, - падкрэсліў ён. - Да нас прыходзіць шмат маладых - гэта таленавітыя людзі, якім мы перадаём і павінны перадаваць свой вопыт, веды і выхоўваць сапраўдных патрыётаў нашай краіны. Таксама асаблівы гонар, што гэта ўзнагарода ўручана ў год 80-годдзя Вялікай Перамогі і 30-годдзя "Белтэлекама".
На заканчэнне Аляксандр Турчын выказаў упэўненасць у тым, што гэта ўзнагарода - не апошняя ў жыцці ўдзельнікаў сённяшняга мерапрыемства. "Яшчэ наперадзе ў нас разам шмат подзвігаў і здзяйсненняў для таго, каб наша краіна жыла ў міры, развівалася і мы ганарыліся яе поспехамі", - даў наказ Прэм'ер.
Фота: БЕЛТА
