Беларусь удзяляе асаблівую ўвагу пашырэнню супрацоўніцтва з краінамі Глабальнага Поўдня. Аб гэтым заявіў Намеснік Прэм'ер-міністра Беларусі Віктар Каранкевіч, выступаючы на Стратэгічным форуме па заключэнні пагаднення аб зоне свабоднага гандлю паміж Еўразійскім эканамічным саюзам і Інданезіяй.
"У бягучым годзе Беларусь старшынствуе ў Еўразійскім эканамічным саюзе. Развіццё ўзаемавыгаднага супрацоўніцтва з краінамі Асацыяцыі дзяржаў Паўднёва-Усходняй Азіі ўваходзіць у лік прыярытэтаў беларускага старшынства ў ЕАЭС. Беларусь разглядае Інданезію ў якасці ключавога партнёра ў рэгіёне Паўднёва-Усходняй Азіі", - адзначыў Віктар Каранкевіч.
Нягледзячы на геаграфічную аддаленасць, Беларусь і Інданезія маюць шмат агульнага, падкрэсліў віцэ-прэм'ер. "Нашы краіны праводзяць знешнюю палітыку, накіраваную на пабудову канструктыўных адносін з замежнымі партнёрамі на аснове ўзаемнага даверу і павагі", - сказаў ён.
Беларусь удзяляе асаблівую ўвагу пашырэнню супрацоўніцтва з краінамі Глабальнага Поўдня. У мінулым годзе Беларусь стала членам Шанхайскай арганізацыі супрацоўніцтва і партнёрам БРІКС. У бягучым годзе Інданезія далучылася да БРІКС у якасці паўнапраўнага члена арганізацыі. Гэта стварае дадатковыя магчымасці для дыялогу і супрацоўніцтва на ўзаемавыгаднай аснове з мэтай развіцця эканомік.
"Эканомікі Беларусі і Інданезіі дапаўняюць адна адну. Мы пастаўляем у Інданезію прадукты харчавання і ўгнаенні, якія важны для ўмацавання харчовай бяспекі краіны. Мы гатовы і далей нарошчваць супрацоўніцтва ў гэтай стратэгічнай сферы. У сваю чаргу з Інданезіі Беларусь імпартуе шырокую лінейку прадукцыі - пальмавы алей, какава-алей, бытавую тэхніку, лекавыя прэпараты. Мы бачым сур'ёзныя перспектывы для нарошчвання супрацоўніцтва і рэалізацыі суб'ектамі гаспадарання новых праектаў па самым шырокім коле напрамкаў", - падкрэсліў Віктар Каранкевіч.
Прэзідэнт Беларусі Аляксандр Лукашэнка 24 лістапада падпісаў указ нумар 413, якім адобрыў у якасці асновы для правядзення перагавораў праект пагаднення аб свабодным гандлі паміж Еўразійскім эканамічным саюзам і яго дзяржавамі-ўдзельніцамі з аднаго боку і Інданезіяй з другога боку. Такім чынам, Беларусь цалкам гатова да падпісання гэтага пагаднення. "Без перабольшання можна сказаць, што стварэнне зоны свабоднага гандлю адкрые новы раздзел у развіцці гандлёва-эканамічных сувязей паміж краінамі ЕАЭС і Інданезіяй, дазволіць нарасціць і ў значнай меры пашырыць узаемавыгаднае супрацоўніцтва", - зрабіў акцэнт віцэ-прэм'ер.
У форуме ўдзельнічаюць прадстаўнікі беларускага бізнесу з розных сектараў эканомікі - машынабудаванне, нафтахімічны комплекс, сельская гаспадарка. "Спадзяюся, што сённяшняя сустрэча дасць магчымасць прадстаўнікам дзяржаўных органаў, гандлёва-прамысловых палат, профільных асацыяцый, бізнесменам Інданезіі, Беларусі і іншых краін ЕАЭС знайсці новых партнёраў і ў поўнай меры выкарыстаць тыя магчымасці, якія адкрыюцца пасля фарміравання зоны свабоднага гандлю. Разлічваем, што гэты форум дазволіць перайсці да практычных дамоўленасцей, якія ў далейшым створаць умовы для павышэння ўзроўню жыцця ў нашых краінах", - сказаў на заканчэнне Віктар Каранкевіч.
