Прэм'ер-міністр Беларусі Аляксандр Турчын наведаў ААТ "Салігорская птушкафабрыка".
У цэнтры ўвагі - вынікі дзейнасці прадпрыемства за 2025 год і вынікі першага квартала 2026 года. Таксама абмяркоўваецца ход рэалізацыі інвэстыцыйных праектаў.
Вытворчасць яек у ААТ "Салігорская птушкафабрыка" за 2025 год склала 480 млн штук (101,5 працэнта да 2024 года), у тым ліку перапяліных - 182,7 млн штук і курыных - 297,3 млн штук. Вытворчасць валавой прадукцыі ў супастаўных цэнах склала 123,6 млн рублёў (100,1 працэнта да 2024 года). На экспарт рэалізавана прадукцыі на $10,2 млн, што склала 112,5 працэнта да 2024 года.
Вытворчасць яек за студзень - сакавік 2026 года склала 133,4 млн штук (103 працэнты да аналагічнага перыяду мінулага года), у тым ліку перапяліных - 66,6 млн штук і курыных - 66,8 млн штук.
ААТ "Салігорская птушкафабрыка" - інвестыцыйна актыўнае прадпрыемства. У 2025 годзе ўведзена ў эксплуатацыю інавацыйная перапяліная ферма. У сувязі з яе выхадам на заяўленую магутнасць узнікла неабходнасць рэалізацыі інвестыцыйнага праекта "Узвядзенне інавацыйнага цэха па перапрацоўцы перапяліных яек". У новым цэху плануецца перапрацоўваць штогод не менш як 108 млн штук перапяліных яек. Асноўнай прадукцыяй вытворчасці інавацыйнага цэха будуць яйкі перапяліныя вараныя ў марынадзе і вэнджаныя, таксама плануецца вытворчасць новай прадукцыі. Напрыклад, макаронных вырабаў з дабаўленнем перапяліных яек, а таксама іншых відаў прадуктаў харчавання, якія змяшчаюць у сваім складзе перапяліныя яйкі. Тэрмін уводу ў эксплуатацыю аб'екта - снежань 2027 года.
У 2026 годзе пачаты работы па рэалізацыі інвестыцыйнага праекта "Узвядзенне селекцыйна-генетычнага цэнтра па вырошчванні перапёлак". Праект рэалізуецца з мэтай стварэння і ўдасканалення кросаў перапёлак з высокай яйцаноскасцю і якасцю харчовага яйка. Увод у эксплуатацыю гэтага праекта - лістапад 2028 года.
Цяпер таксама вядзецца рэканструкцыя птушнікаў, прадугледжаная праектам, што дасць магчымасць павялічыць колькасць пасадачных месцаў для дарослага пагалоўя курэй-нясушак на 89 тыс. птушкамесцаў, атрымаць дадаткова 23,4 млн курыных яек. Увод у эксплуатацыю двух птушнікаў запланаваны на снежань 2027 года.
У ходзе рабочай паездкі ў Салігорскі раён Аляксандр Турчын не выпусціў з-пад увагі і ключавую для аграрыяў тэму - ход веснавых палявых работ. Асаблівая ўвага была ўдзелена тром асноўным аспектам. Першы - тэмпы сяўбы, аператыўнасць правядзення пасяўной кампаніі і выкананне агратэхнічных тэрмінаў. Другі - кукуруза. Як адной з галоўных кармавых культур, яе сяўбе ўдзяляецца павышаная ўвага. Трэці - гатоўнасць тэхнікі. Ключавое пытанне, якое знаходзіцца на асаблівым кантролі, - ці забяспечана бесперабойная работа пасяўных комплексаў і трактарнага парку.
